Bedeýlikti emdep qana qoımaı, sebepterimen kúresýimiz kerek - Ajar Ǵınııat

ShYMKENT. QazAqparat - QR Densaýlyq saqtaý mınıstri Ajar Ǵınııat Shymkent qalasynda ótken «Bedeýlikti emdeýdiń zamanaýı tásilderi. QRT: búgini men bolashaǵy» atty IX óńirlik halyqaralyq konferentsııasyna qatysty, dep habarlaıdy QazAqparat.

«Densaýlyq saqtaý júıesiniń negizgi maqsattarynyń biri - halyqtyń densaýlyǵyn, onyń ishinde reprodýktıvti densaýlyqty nyǵaıtý, demografııalyq jaǵdaıdy jáne ómir súrý sapasyn jaqsartý. Bizdiń maqsatymyz - bedeýlikti emdeý ǵana emes, onyń aldyn alý jáne sebepterin joıý boıynsha shara qabyldaý», - dedi quttyqtaý sózinde QR Densaýlyq saqtaý mınıstri.

Ajar Ǵınııat reprodýktsııa salasynda jańa tehnologııalardy tabysty engizý maqsatynda barlyq jaǵdaı jasalǵanyn atap ótti.

Birinshi kezekte, zańnamalyq baza qamtamasyz etildi, qosalqy reprodýktıvtik tehnologııalardy júzege asyrýdyń barlyq aspektilerin retteıtin NQA bekitildi, túrli beıindegi mamandar daıarlandy.

Osy sharalardyń arqasynda búginde elimizde 29 EKU ortalyǵy jumys isteıdi.