Bazalyq zeınetaqy taǵaıyndaý tártibi 2017 jyldan bastap ózgeredi - Senat
Zań jobasynda zeınetaqy júıesine qatysý ótiline baılanysty bazalyq zeınetaqy taǵaıyndaý tártibi ózgertiledi, atap aıtqanda, bul ózgeris 2017 jyldyń 1 shildesinen bastap júzege asady. Bul rette bazalyq zeınetaqy azamattar zeınetkerlik jasqa jetken kezde ǵana jáne zeınetaqy júıesine qatysý ótiline baılanysty taǵaıyndalady. Zeınetaqy júıesine qatysý ótili 10 jyldan az jáne eńbek ótili bolmaǵan jaǵdaıda bazalyq zeınetaqynyń mólsheri eń tómen kúnkóris deńgeıiniń 50 paıyzyna teń bolady. Budan bólek, 10 jyldan artyq eńbek ótilinde árbir jyl úshin 2 paıyzǵa artyp otyrady. Biraq, eńbek ótili 35 jáne odan da kóp jyl bolǵan jaǵdaıda zeınetaqy eń tómengi kúnkóris deńgeıiniń 100 paıyzynan aspaýy tıis.
Sonymen qatar, zań jobasy arqyly áskerı qyzmetkerlerdi, áskerı qurylymdardaǵy qyzmetkerlerdi zeınetaqymen qamsyzdandyrý 2016 jyldyń 1 qańtarynan bastap memlekettik bıýdjet esebinen júzege asyrylady. Budan bólek, azamattardyń zeınetaqymen qamtamasyz etilýi boıynsha jumys berýshilerdiń jaýapkershiligin kúsheıtý maqsatynda 2018 jyldyń 1 qańtarynan zeınetaqy júıesiniń jańa shartty-jınaqtaýshy quramdasyn engizý usynylady. Bul jumys berýshiniń esebinen jumysshy kirisiniń bes paıyzy mólsherinde mindetti zeınetaqy jarnalarynan qalyptasady. Jumys berýshiler tarapynan aýdarylatyn bes paıyzdyq mindetti zeınetaqy jarnasy Biryńǵaı jınaqtaýshy zeınetaqy júıesinde ashylǵan árbir jumysshynyń shartty zeınetaqy shotynda kórsetiletin bolady. Mundaı zeınetaqy salymdary azamattardyń menshigi bolyp tabylmaıdy.
Komıtet zań jobasyn talqylaı kele, qujatty palatanyń aldaǵy jalpy otyrysyna shyǵarý týraly sheshim qabyldady.