Bazalyq stantsııa daýy: zańgerler qarsy, operatorlar qoldap otyr
ASTANA. KAZINFORM – Uıaly baılanystyń bazalyq stantsııasyn turǵyn úıler men kommertsııalyq ǵımarattardyń shatyryna ornatý máselesi zańgerler men telekommýnıkatsııa salasynyń ókilderi arasynda kelispeýshilik týǵyzyp otyr.
Tsıfrlyq damý, ınnovatsııalar jáne aeroǵarysh ónerkásibi mınıstrligi turǵyndardyń mindetti kelisimin alyp tastaý usynysyn engizip jatqan kezde, baılanys operatorlary qaýymdastyǵy bul bastamany baılanystyń sapasyn arttyrýǵa jasalǵan qadam dep esepteıdi, al zańgerler menshik quqyǵynyń buzylýyna alańdaýshylyq bildirip jatyr.
Mınıstrlik uıaly baılanys bazalyq stantsııalaryn ornalastyrýǵa qatysty zańnamaǵa ózgerister engizýdi usyndy. «Ashyq NQA» portalynda jarııalanǵan jobaǵa sáıkes, vedomstvo kópqabatty turǵyn úılerdiń shatyryna jabdyq ornatý kezinde turǵyndardyń mindetti kelisimin alý talabyn alyp tastaýdy kózdep otyr.
Bul túzetýler tek kondomınıým nysandaryna ǵana emes, sondaı-aq jekemenshik jáne kommertsııalyq jyljymaıtyn múliktiń basqa da túrlerine qatysty. Qujat boıynsha qoǵamdyq talqylaý 5 maýsymǵa deıin jalǵasady, kez kelgen adam usynysy men eskertýin qaldyra alady.
– Jeke menshik – qol suǵylmaıtyn qundylyq. Túzetýler kondomınıým uǵymyn ózgertip, ony ortaq menshikke aınaldyryp jatyr. Alaıda bul azamattyq kodekske qaıshy keledi. Kodeks óz kúshinde qalady jáne menshik ıesiniń mámileni qabyldaý nemese qabyldamaý quqyǵyn joıý múmkin emes. Jalǵyz úmit – Ádilet mınıstrligi men Konstıtýtsııalyq sotta. Atalǵan organdarǵa ujymdyq shaǵym joldaýǵa bolady, – dep túsindirdi zańger Saıken Aısın Jibek Joly telearnasynyń efırinde.
Baılanys operatorlary qaýymdastyǵy bul bastamany qoldap otyr. Olar abonentter sanynyń kúrt ósýi men jelige túsetin júktemeniń artýy aıasynda usynystyń ózektiligin atap ótti. Eger ınfraqurylym keńeıtilmese, operatorlar turaqty baılanys pen jyldam ınternetti qamtamasyz ete almaıdy, ásirese halyq tyǵyz ornalasqan óńirlerde. Sarapshylardyń pikirinshe, ǵımarattar shatyryna bazalyq stantsııalardy ornatý – el boıynsha tsıfrlyq qoljetimdilik pen baılanys sapasyn arttyrý úshin qajet qadam.
– Operatorlar jabdyqtyń qaýipsizdigin dáleldeýge, múlik ıeleriniń birlestigimen shart jasasýǵa jáne jaldaý aqysyn tóleýge mindetti. Bul baılanys pen ınternet sapasyn jaqsartýǵa múmkindik beredi, al turǵyndar ınfraqurylymdy paıdalanǵany úshin ótemaqy ala alady. Sonymen qatar, jabdyqty beıbereket ornatýdyń aldyn alý úshin ony ornalastyrý tártibin naqty kórsetý qajet, – dedi Baılanys operatorlary qaýymdastyǵynyń prezıdenti Oleg Emelıanov.
Sala ókilderiniń aıtýynsha, jańa túzetýler men ózgertýlerdi qabyldaý telekommýnıkatsııalyq ınfraqurylymnyń damýyn jedeldetip, turǵyndar úshin sapaly baılanysqa teń qoljetimdilikti qamtamasyz etedi.
Eske salaıyq, bazalyq stantsııa ornatýǵa úı turǵyndarynyń 70% kelisimi kerek.