Bazalyq mólsherleme jyl sońyna deıin ózgerissiz qalady — ETDQ
ASTANA. KAZINFORM — Ulttyq banktiń bazalyq mólsherlemesi jyl sońyna deıin 16,5 paıyz deńgeıinde ózgerissiz qalady. Mundaı boljamdy Eýrazııalyq turaqtandyrý jáne damý qory makroekonomıkalyq boljaý jáne zertteý bóliminiń bastyǵy Marına Grıchık jasady.
Búgin elordada ótken brıfıng barysynda atalǵan qordyń ekonomısi Ǵalymjan Aıtqazyn elimizdiń qazirgi ekonomıkalyq ahýalyna toqtalyp, eń aldymen munaı men memlekettik ınvestıtsııa ósimin atap ótken edi. Onyń aıtýynsha, munaı ósimi Teńiz ken ornyn ıgerýmen baılanysty bolsa, negizgi kapıtalǵa salynǵan memlekettik bıýdjet kólemi jyl basynan 22 paıyzǵa jýyq artqan.
— Osy jyldyń 1-toqsanyndaǵy ekonomıka ósimi ótken jyldyń sońǵy toqsanymen salystyrǵanda baıaýlady. Biraq, ótken jyldyń 1-toqsanynda ekonomıkalyq ósim birshama tómen bolsa, bıyl 5,6 paıyz boldy. Ózderińiz de biletindeı Úkimet jedel derekter boıynsha ekonomıka ósimi munan ary jedeldep, 6 paıyzdan asyp túskenin aıtqan bolatyn. Al ınflıatsııaǵa qatysty aıtar bolsaq, ol bıyl qaıtadan eki mándi kórsetkishke oraldy. Bul biz atap ótken táýekelderdiń biri. Máselen, bul kórsetkish mamyr aıynan arta bastap, maýsymda 11,3 paıyzdan astam boldy. Árıne, osynyń aıasynda Ulttyq bank naýryzda aqsha-kredıt saıasatyn qatańdatyp, bazalyq mólsherlemeni jyldyq 16,45 paıyzǵa deıin kóterdi. Ázirshe osy deńgeıde saqtaıdy ári ınflıatsııany qalypqa keltirý úshin ol qajet dep sanaıdy. Ekinshi jaǵynan jalpy ekonomıkalyq ósim men ınflıatsııalyq qysymnyń mańyzdy kózi — kredıtteýdiń artýy. Ol eki mándi kórsetkishte qalyp otyr. 1-toqsanda ekonomıkany kredıtteý jyldyq mánde 20 paıyzǵa artty, — dedi ekonomıst.
Al ETDQ makroekonomıkalyq boljaý jáne zertteý bóliminiń bastyǵy Marına Grıchık qor Qazaqstan ekonomıkasyndaǵy ınflıatsııany baǵalaý kórsetkishin bolmashy arttyrǵanyn aıtady.
— Bul birinshi jartyjyldyqtaǵy ınflıatsııa qarqynymen ǵana baılanysty. Ol biz kútkennen sál jyldam damýda. Jalpy 2024-2025 jyldyń qys aılarynan keıin ınflıatsııanyń baıaýlaıtyndyǵyn kútemiz. Aqsha-kredıt saıasaty qatań bolyp qalady jáne ortamerzimdi keleshekti ınflıatsııany maqsatty mánge ákelýge baǵyttalady. Osynyń aıasynda bazalyq mólsherlemeniń jyl sońyna deıin ózgerissiz qalady dep esepteımiz, — dedi ol.
Buǵan deıin Ulttyq bank tóraǵasy Tımýr Súleımenov bazalyq mólsherleme deńgeıin saqtaý sebebin túsindirgen edi.