Baıqońyrlyqtar Jeńis kúnin qalaı atap ótti
«Baıqońyr» kesheninde ornalasqan Qazaqstan men Reseı quqyq qorǵaý organdarynyń, áskerı jáne qoǵamdyq uıymdarynyń ókilderi qalanyń ortalyq alańy arqyly áskerı sherý jasap ótti. Jeńis kúni baǵdarlamasynda patrıottyq is-sharalar, Jeńis eskertkishine gúl shoqtaryn qoıý, Baıqońyr qalasyndaǵy «Batyrlarǵa taǵzym» atty bas kóshelerdegi sherý, ardagerlerdi qurmetteý, qalalyq saıabaqtaǵy dalalyq taǵamdar, úlken kontserttik baǵdarlama, merekelik otshashý boldy.
Búgingi tańda Baıqońyrda soǵys ardagerleri qalǵan joq. Qalada 58 tyl eńbekkeri turady, olardyń eshqaısysy nazardan tys qalmady. Jeńis kúni qarsańynda tyl eńbekkerleri RF Prezıdenti atynan, Baıqońyr qalasy ákimdigi atynan jeke quttyqtaý alyp, olarǵa qalalyq uıymdar men kásipkerler atynan azyq-túlik túrindegi jáne basqa da syılyqtar tabystaldy, dedi qalalyq turǵyndardy áleýmettik qorǵaý basqarmasynyń ókilderi.
Mereke qarsańynda Baıqońyr qalasynyń ákimi Konstantın Býsygın Ardagerler úıine baryp, olardy merekemen quttyqtady.
Avtor: Sara Qabıqyzy
