Baıqońyrdan «Proton-M» zymyran tasyǵyshy ushyryldy

BAIQOŃYR. QazAqparat - 2017 jyldyń 12 qyrkúıegi kúni, Astana ýaqytymen 01 saǵat 23 mınýtta «Baıqońyr» ǵarysh aılaǵynan «Amazonas-5» telekommýnıkatsııalyq spýtnıgi bar «Proton-M» zymyran tasyǵyshy ushyryldy. Ǵarysh aılaǵynyń shuǵyl qyzmetteri men Qazaqstannyń jerústi arnaıy qyzmetteriniń málimeti boıynsha, ushyrylym shtattyq rejimde ótti, dep habarlaıdy «QazAqparat» HAA tilshisi.

Zymyran tasyǵyshynan ajyraıtyn bólshekter belgilengen aýmaqqa qulady, 528-inshi sekýndta «Proton»-nan úshinshi saty shtatty túrde ajyrady. Ol «Amazonas-5» telekommýnıkatsııalyq spýtnıgi bar «Brız-M údetkish blogyn tirekti orbıtaǵa shyǵardy. Ushý tsıklogrammasyna sáıkes, ǵarysh apparatynyń geoótpeli orbıtaǵa shyǵarylýyn odan ári údetkish blok jalǵastyrady. «Amazonas-5»-tiń maqsatty orbıtaǵa shyǵýy 9 saǵat 12 mınýtty quraıdy. Ol dittegen jerine 12 qyrkúıek kúni Astana ýaqytymen saǵat 10.35-te jetýi tıis.

Budan keıin telekommýnıkatsııalyq spýtnık basqarý úshin tapsyrys berýshi - ıspanııalyq Hispasat kompanııasyna beriledi.

Buǵan deıin habarlaǵanymyzdaı, Roskosmos saıtynda zymyrannyń ushyrylymy jáne oǵan ázirligi saǵat 23:00-den bastap (11 qyrkúıek) onlaın kórsetildi.