Baıqońyrda lańkestikke qarsy oqýlar ótip jatyr

BAIQOŃYR. QazAqparat - Baıqońyr qalasy aýmaǵynda 1 aptaǵa sozylatyn «Boran - Baıqońyr 2016» jáne «Lıkvıdatsııa» komandalyq-shtabtyq oqýlary ótip jatyr, dep habarlaıdy QazAqparat tilshisi.

Baıqońyr qalasyndaǵy jedel shtab jetekshisi, Reseı FQQ bóliminiń basshysy polkovnık Evgenıı Medvedevtiń habarlaýynsha, № 21 «Vasılek» balabaqshasy bazasynda ótetin «Boran - Baıqońyr 2016» oqýynyń mindeti - halyq kóp baratyn oryndardaǵy lańkestik aktini boldyrmaý. «Atqarýshy bılik organdary men qyzyǵýshylyq tanytqan ózge de mekemeler qatysqan oqýlarda lańkestikke qarsy operatsııalardy basqarý jáne lańkestik akt saldaryn azaıtý jáne joıý boıynsha tájirıbelik is-sharalar pysyqtaldy», - dedi Evgenıı Medvedev.

Sonymen birge, dál osy nysanda qala ákimshiligi kúshteri mektepke deıingi bilim berý nysandaryndaǵy terakt saldaryn joıý boıynsha komandalyq-shtabtyq oqýlar ótkizdi, dep habarlady qalalyq ákimdiktiń baspasóz qyzmeti.

Lańkestikke qarsy oqýlardy ótkizýge baılanysty Baıqońyr qalasyndaǵy tórt kóshe mańyndaǵy turǵyndar qozǵalysyna shekteýler engizildi.