Baıqońyr kúlli adamzat ıgiligi, onyń kosmonavtıkadaǵy tarıhı róli zor - Qasym-Jomart Toqaev

NUR-SULTAN. QazAqparat – Baıqońyr – kúlli adamzattyń ıgiligi, onyń álemdik kosmonavtıkadaǵy tarıhı róli zor. Bul pikirdi Memleket basshysy Qasym-Jomart Toqaev Reseıdiń «Komsomolskaıa pravda» gazetine bergen suhbatynda aıtty, dep habarlaıdy QazAqparat.

«Ǵarysh salasyndaǵy birlesken ózara is-qımyldar men Baıqońyr qalasyn birlesip damytý isi – Qazaqstan men Reseıdiń kópjaqty yntymaqtastyǵynyń aıqyn kórinisi. Ǵarysh aılaǵynyń tirshiligi men onyń tıimdi damý máselelerin Úkimetaralyq komıssııa qarastyrady. Ásirese, baılanys, televızııa jáne ǵylymı zertteýler salasynda qoldanylatyn azamattyq ǵarysh apparattaryn qurý máselesine basymdyq beriledi. «Gagarın starty» jobasy boıynsha birlesken jumystar atqarylýda. Ǵaryshqa jol ashqan osy tarıhı alańdy jańǵyrtýǵa Qazaqstan, Reseı jáne BAÁ ınvestorlary qarajat salýǵa nıetti», - dedi Q. Toqaev.

Sonymen birge, Prezıdent ýytty otyn paıdalanatyn «Proton» zymyranynyń ornyna ekologııalyq taza tasymaldaýshylarda apparat ushyrýdy kózdeıtin «Báıterek» keshenin eske saldy.

«Eki el ekonomıkasynyń damýyna aıtarlyqtaı úles qosa alatyn «Baıqońyr» erkin ekonomıkalyq aımaǵyn qurý týraly Qazaqstannyń bastamasyn erekshe atap ótkim keledi. Bıyl qazan aıynda ǵarysh aılaǵynyń salynǵanyna 65 jyl tolady. Bizdiń elderimiz bul ataýly datany laıyqty dárejede atap ótýi kerek dep sanaımyn. Óıtkeni Baıqońyr – búkil adamzattyń ıgiligi. Onyń álemdik kosmonavtıkadaǵy tarıhı róli zor», - dedi Qasym-Jomart Toqaev.