Baıqońyr ǵarysh aılaǵynan «Progress MS-16» júk kemesi ushyryldy

BAIQOŃYR. QazAqparat – 15 aqpanda Nur-Sultan ýaqytymen saǵat 10:45-te «Progress MS-16» kóliktik basqarylatyn júk kemesi bar «Soıýz-2.1a» zymyrantasyǵyshy ushyryldy, dep habarlaıdy QazAqparat tilshisi.

Zymyran ornatylǵan Baıqońyr ǵarysh aılaǵynyń 31-shi alańynda tikeleı efır startqa 50 mınýt qalǵanda bastaldy.

Osy ýaqyt boıy Roskosmos telestýdııasy kóliktik kemeniń daıarlyǵy týraly beınesıýjetter, ǵaryshkerler jáne ǵarysh salasynyń mamandarymen júrgizilgen suhbattardy kórsetti.

Ushyrý shtattyq rejımde ótti, tikeleı reportaj júrgizýshileri zymyran-tasyǵysh ornatylǵan satylardyń shtattyq bólimi týraly habarlady.

Starttyń onynshy mınýtynda «Progress MS-16» kóliktik ǵarysh kemesi Jer seriginiń orbıtasyna shyǵaryldy.

Buǵan deıin habarlanǵandaı, 12 aqpanda «Soıýz-2.1a» zymyran-tasyǵyshy Baıqońyr ǵarysh aılaǵynyń starttyq keshenine shyǵarylyp, ornatyldy.

Búgin tańerteń startqa daıarlyq qorytyndylary jónindegi memlekettik komıssııa «Soıýz-2.1a» zymyrantasyǵyshyn otyn quıyp, ushyrý sheshimin qabyldady.

Bul start arqyly Roskosmos Baıqońyr ǵarysh aılaǵynan 2021 jylǵy ushyrý baǵdarlamasyn bastady.

«Progress MS-16» zymyrantasyǵyshynyń Halyqaralyq ǵarysh stansasyna ushyrylýy eki táýliktik keste boıynsha ótedi.