Baıqońyrdan Reseıdiń Jerdi baqylaıtyn spýtnıgi ushyryldy

ASTANA. KAZINFORM- Sońǵy bir aıda «Baıqońyr» ǵarysh aılaǵynan eki ǵaryshtyq ushyrylym júzege asyryldy. 

Búgin Astana ýaqytymen saǵat 14:36-da ǵarysh aılaǵynyń №31 alańynan №4 Jerdi qashyqtyqtan zondtaý resýrs - P ǵarysh kemesi bar «Soıýz-2.1b» zymyran tasymaldaǵyshy ushyryldy.

Roskosmos telestýdııasy mamandarynyń ushyrý alańynan júrgizgen tikeleı efıri 13 saǵat 50 mınýtta bastalyp, ǵarysh kemesi orbıtaǵa shyqqanǵa deıin júrgizildi.

Ushyrý qalypty rejımde ótip, zymyran tasymaldaǵyshtyń satylaryn bólý belgilengen ýaqytta júzege asyryldy jáne ushyrylǵannan keıin 10 mınýttan soń ǵarysh kemesi Jer orbıtasyna shyǵaryldy.

Reseılik Jerdi qashyqtyqtan zondtaý spýtnıgi planetamyzdyń tabıǵı resýrstaryn zertteıdi, qorshaǵan ortanyń lastanýyn baqylaıdy, paıdaly qazbalardyń ken oryndaryn izdeıdi, muz jaǵdaıyn jáne tótenshe jaǵdaılardy baqylaıdy.

Esterińizge sala keteıik, buǵan deıingi alǵashqy ushyrylym 2024 jyldyń 23 naýryzynda Belarýstiń alǵashqy áıel ǵaryshkeriniń basqarýymen HǴS-qa ushqan «Soıýz MS-25» ǵarysh kemesi boldy.

Al 2024 jylǵy 29 aqpanda Vostochnyı ǵarysh aılaǵynan Reseıdiń eń jańa «Meteor-M» №2-4 ǵarysh kemesi sátti ushyrylyp, orbıtaǵa shyǵaryldy. Bul klımat pen qorshaǵan ortany baqylaýdy qamtamasyz etetin «Meteor-3M» gıdrometeorologııalyq tobynyń bóligi sanalady.