Baıbek mınıstrlerge taýarlardy jeńildikpen satý jaıynda aıtyp berdi

 ASTANA. QazAqparat - Búgin Úkimette Almatydaǵy Ýnıversıadaǵa daıyndyq sharalaryn talqylaý barysynda qala ákimi Baýyrjan Baıbek saýda ortalyqtarynda uıymdastyrylatyn jeńildikter aktsııasy týraly aıtyp berdi, dep xabarlaıdy QazAqparat tilshisi.

Onyń aıtýynsha, sporttyq shara aıasynda 40-tan astam mádenı shara uıymdastyrylady. Sportshylar jatatyn qalashyqtyń dál janynda etnoaýyl festıvali ótedi. Al bas shtabtyń aldynda mýltımedııalyq qurylǵylarmen jabdyqtalǵan kıiz úı ornatylady. "Budan bólek, qańtardyń 20-sy men aqpannyń 10-y aralyǵynda qalada jeńildikter festıvali ótedi. Oǵan 100-ge jýyq saýda ortalyǵy qatysady. Taýarlardyń baǵasy 10-80 paıyzǵa deıin tómendetiletin bolady", - dep atap kórsetti Baıbek.

Aıta keteıik, qańtardyń 23-i kúni Búkilálemdik qysqy Ýnıversıada qalashyǵyna sportshylar ornalasa bastaıdy. Ýnıversıada  kezinde 7 myńnan astam polıtsııa qaýipsizdikti qamtamasyz etedi.  Tehnıkalyq, sanıtarlyq jáne ekologııalyq normalarǵa saı emes kólikter Almatyǵa kirgizilmeıdi. 

Almaty qalasynda ótetin Ýnıversıadaǵa álemniń 59 elinen 2 myńnan astam sportshy qatysady.  Qazaqstannyń namysyn 168 sportshy qorǵaıdy. Almaty qalysynyń ákimi Baýyrjan Baıbektiń aıtýynsha, Reseı, Qytaı, Kanada sııaqty memleketter Almaty Ýnıversıadasyna úzdik sportshylaryn attandyrǵaly otyr.