Baıanaýyldaǵy «Molalar alqabynyń» qupııa syry
«Han qoryq» jastar festıvaline qatysýshylar Qola dáýirindegi biregeı tastarmen jabylǵan baıanaýyldyq «Molalar alqabyna» qyzyǵýshylyq tanytty. Qazba jumystaryn qyz-jigitter Tımýr Smaǵulov basshylyq etetin aımaqtyq Margulan Sentre arheologııalyq ortalyǵymen birlesip ótkizýde, dep habarlaıdy pavlodarnews.kz .
- Bizdi Andronov mádenıetiniń eskertkishteri qyzyqtyrdy. Munda jerleý rásimi shamamen úsh jarym myń jyl buryn ótkizilgen. Biz andronovtyqtar jerleý rásimine arnaıy tańdap alǵan aýmaqta júrmiz. Jalpy, buryn da olar osy aımaqta ómir súrip, mal asyraǵan. Ókinishe oraı, urylar qabirde baǵaly zattar bar ekenin bilip, sol zamannyń ózinde tonaý jasaǵan. Olaı bolmaǵanda, osy jerde altyn, kúmis pen qoladan quıylǵan áshekeı-buıymdar tabylatyn edi, - deıdi ekspedıtsııaǵa kelgen reseılik tanymal maman, Dostoevskıı atyndaǵy Omby memlekettik ýnıversıtetiniń ókili, tarıh ǵylymdarynyń kandıdaty, etnologııa, antropologııa, arheologııa men fızıologııa kafedrasynyń dotsenti Irına Tolpeko.
Ǵalymdardyń aıtýynsha, qabirde jatqandardyń basym bóligi - áıelder. Al, olardyń mańynda kóbi bir jasqa tolmaǵan sábıler jerlengen. Ne sebepti? Arheologtar osy jaǵdaıdyń syryn ashý nıetinde.
Aıta ketken jón, bes jyl buryn Omby memlekettik ýnıversıteti men Pavlodar memlekettik pedagogıkalyq ınstıtýty ózara kelisim jasaǵan. Birneshe jyldan beri Margulan Sentre ortalyǵymen birge stýdentter qazba jumystaryn júrgizip keledi. Bıyl «Týǵan jer» baǵdarlamasy aıasynda Baıanaýyl óńirine arheologııalyq zertteý jasalýda.
- Mundaǵa qazba jumystary eki aı boıy jalǵasýda. Molalar mekenin birneshe myń adam kórdi. Ekspedıtsııanyń basty maqsaty - aspan astyndaǵy tańǵajaıyp murajaıdyń negizin qalaý. Bul aımaq abattandyrylyp, kórkeıýi kerek. Aldaǵy ýaqytta osy aımaqqa joldar jasalyp, aqparattyq taqtalar ilinedi. Toraıǵyr ózenindegi Baıanaýyl arheologııalyq murajaıynda jóndeý jasalyp, tabylǵan jádigerler sonda jiberiledi, - deıdi Tımýr Smaǵulov.
