Baıanaýyl ormandarynda emin-erkin jaıylyp júrgen bulandar beınetaspaǵa tústi
PAVLODAR. KAZINFORM — Bulan — Qazaqstandaǵy buǵylar tuqymdasyna jatatyn eń iri sútqorekti, tuıaqty janýar. Qazirgi ýaqytta Baıanaýyl ulttyq parkiniń aýmaǵynda 90-ǵa jýyq bulan bar dep esepteledi.
Baıanaýyl ulttyq parkiniń aýmaǵynda sońǵy jyldary bulandar kóbeıe bastaǵan. Taýlar arasyndaǵy orman-toǵaılardy bulandar qysy-jazy meken etedi. Tuıaqty janýarlar aýmaqta 1985 jyldan beri jıi baıqalyp otyr. Bul janýardyń bir ereksheligi, aǵzasynda jylqy sekildi ót bolmaıdy. Aşylaýyt, qamysty, qoǵaly jerlerge jaıylǵandy, terektiń qabyǵymen, taýdaǵy arshamen qorektengendi unatady. Baıanaýyldyń Kúrkeli, Jaıaý Musa, Qarajar aýyldary mańyndaǵy bıik taýlarda, Jalańtós asýy men Myrzashoqyda, Qońyr áýlıe úńgiri mańynda jıi ushyrasady.
— Atalǵan jabaıy janýardyń shoqtyǵynyń bıiktigi 2 metrge jetedi, salmaǵy 600 kg-daı. Túsi qysta qara qońyr, jazda qońyrqaı, basy, aıaǵy aqshyldaý keledi. Aldyńǵy aıaqtaryndaǵy tuıaqtary ótkir, bul qorǵaný kezinde qarý retinde qoldanýǵa múmkindik beredi. Mundaı tuıaq kókjal qasqyrdyń basyn jaryp jiberýge nemese ishin tilip jiberýge jetkilikti. Atalyǵynyń úlkeninde sheńber tárizdi múıizderi bolady. Múıizderiniń kólemi 180 sm-ge deıin ósip, salmaǵy 20-30 kg-ǵa deıin jetedi. Kúzde múıizderi túsip, al sáýir-mamyr aılarynda qaıtadan jańa múıizder ósip shyǵady. Analyqtarynda múıiz bolmaıdy, — dep habarlady ulttyq parkten.
Pavlodar oblysynda bulan Baıanaýylmen qosa, Ertis ormany rezervatynda kezdesedi. Olardy atýǵa tyıym salynǵan.
Baıanaýyl ormandarynda bulandar buǵan deıin de kózge túskenin jazǵanbyz.