Baıan-Ólgıı aımaǵynda «Qusbegiler saraıy» salynady - sheteldegi qazaq baspasózi
Kazinform HAA sheteldegi qazaq tilinde taraıtyn aqparat kózderine aptalyq sholýyn usynady.
Baıan-Ólgıı aımamaǵynda «Qusbegiler saraıy» salynady - Janadauir
Mońǵolııanyń «Jańa dáýir» basylymy «Qazaq qusbegilik odaǵynyń» atqarýshy dırektory Bekbolat Buǵybaıulymen ótkizilgen suhbatyn jarııalady. Atalǵan BAQ-tyń dereginshe, Baıan-Ólgıı aımaqtyq qusbegilik odaǵynyń bastamasymen osy aımaqta «Qusbegiler saraıy» salynady. Tilshi odaqtyń atqarýshy dırektorynan bul joba negizinen qashan júzege asatynyn suraǵan.
Bekbolat Buǵybaıulynyń aıtýynsha, Baıan-Ólgıı aımaǵynda búrkitshilerdiń eki odaǵy bar. Sonyń biri – «Qazaq qusbegilik odaǵy» óz is-qyzmetin júrgizgeli bıyl 3 jyldyń júzi bolǵan. Odaqtyń tóraǵasy kóp jyldar boıy tabıǵat, týrızm salasyn basqarǵan Ataı Aıathanuly. Al, Bekbolat Buǵybaıuly atqarýshy dırektor qyzmetinde. Osy ýaqyt aralyǵynda qusbegiler saıysyn uıymdastyrý, qusbegiler týraly kitap shyǵarý, materıal jınaqtaý qatarly sharýalar júrgizildi. Ótken jyly búrkitshiler toıyn Sary kólde uıymdastyrǵan. Buǵan deıin 24 ret búrkitshiler toıy ótken eken. Sonyń arqasynda álemniń túkpir-túkpirindegi kóptegen saıahatshylarǵa tanylǵan. Búrkit jáne búrkitshiler ulttyq brend dárejesine kóterilipti.
Alaıda olardyń bir kemshiligi – tek búrkitshiler toıy kezinde ǵana búrkitshilerdi eske alady. Sondyqtan da osy kisilerdiń basyn qosqan bir uıym bolsyn. Ol uıymnyń óz saraıy, búrkitshiler týraly maǵlumatty bir ortalyqtan alsyn degendi maqsat tutqan. Saraıdyń kólemi – 120 sharshy metr. Kıiz úı tárizdes. Sheteldik qonaqtar maǵlumat alsa, alys joldan kelgen búrkitshilerimizdiń bas suǵatyn ordasy dep túsinse bolady.
Atalǵan ortalyqta búrkitti otyrǵyzatyn jeke úıshik tárizdes kabınka, at baılaıtyn jeke qora, saraıdyń syrtynda qashasy, dárethana jáne taǵy basqalaı dúnıeler de oılastyrylǵan. Olar osy oılaryn iske asyrý úshin qarjy engizetin sheteldik kompanııalarǵa, qorlarǵa jobasyn tanystyrý nátıjesinde «Cultural Sanctuaries Foundation» atty uıym qarjy engizip, búrkitshiler saraıynyń sýret jobasy jasalyp bektilgen.
Qazirgi tańda bir kompanııamen shart jasaý arqyly qurylys jumysy bastalmaq kórinedi. Endigi jospar boıynsha, kelesi búrkitshiler toıyna deıin aıaqtalady dep kútilýde.
Mońǵolııalyq basylymnyń málimetinshe, «Cultural Sanctuaries Foundation» uıymy mádenı murany qorǵaý, saqtaý, bolashaqqa jetkizý maqsatynda jumys istep otyrǵan beıresmı uıym. Ortalyǵy – Amerıka Qurama Shtatynda. Al endi maqsatyna kelsek – qazirgi tańda kóptegen ulttyq brendimiz arqyly, servıs daıashylyqtaryn jaqsartý arqyly elimizge, aımaǵymyzǵa kóptegen týrıst tartý.
«Qazaq qusbegilik odaǵynyń» atqarýshy dırektory Bekbolat Buǵybaıuly suhbatynda tilshiniń taǵy birneshe suraqtaryna jaýap bergen.
Hýnanda saýyt-dýlyǵa jasaıtyn qandasymyz Estaı Kádirqanuly – CNR
Saýyt-dýlyǵa jobalaýshysy Estaı kóne murany jańǵyrtýda.
Qytaıdyń Hýnan ólkesi Chańsha qalasynyń ońtústik shetindegi shaǵyn aýdanda ornalasqan qarapaıym jumys bólmesinde bir qazaq jigiti saýyt-dýlyǵa jasaýmen aınalysady. Onyń aty-jóni Estaı Kádirqanuly. Saýyt-dýlyǵa jasaý ornynyń jobalaýshysy E.Kádirqanuly atalǵan jumyspen aınalysqanyna 14 jyl bolypty, dep habarlaıdy Qytaıdyń «Ortalyq halyq radıosy».
Qytaılyq BAQ-tyń málimetinshe, saýyt-dýlyǵa jasaý birshama kúrdeli, qıyndyǵy bar ónerge jatady. Onyń ústine qoǵamnyń jáne ǵylym-tehnıkanyń búgingideı damyǵan zamanynda jeke qorǵanys buıymy retinde qoldanylatyn saýyt-dýlyǵaǵa qajetsiný tómendegeni belgili. Sol sebepti bul jumystan paıda tabý qıyndaý bolady. Degenmen qyzyǵýshylyqtan bastalǵan kásipti jalǵastyrýdyń qıyndyǵy bolǵanymen, Estaı Kádirqanuly alda múmkindikterdiń kóp bolatyndyǵyna senimmen qaraıdy eken.
Qytaıdyń ishki ólkelerinde turyp, erekshe ónermen shuǵyldanyp jatqan Estaı Kádirqanulynan osy aptada Qytaıdyń Ortalyq halyq radıosynyń tilshileri Gúlbaqsha Mádiqyzy men Aınur Gimińǵazyqyzy arnaıy baryp daıyndaǵan beınejazbany usynǵan.
Túrkııa teleradıo korporatsııasy 60 jasta - TRT
Túrkııanyń kórý jáne estý jadysy Túrkııa teleradıo korporatsııasy (TRT) 60 jasta. Jarty ǵasyrdan astam ýaqyttan beri umytylmas efırler men jańalyqtar TRT ekranynan kórermenge usynylyp keledi.
Bul týraly Túrkııa Radıo Televızııa portaly habarlady.
Atalǵan BAQ-tyń dereginshe, Túrkııada 1927 jyly 6 mamyr kúni radıo efırleri bastalǵan TRT-niń keıin telearnalary iske qosyldy.
Alǵashqy efırin 1968 jyly 31 qańtar kúni Mıthatpasha stýdııasynan bastalǵan TRT-niń 1964 jyly 1 mamyr kúni qabyldanǵan zańmen Túrkııa teleradıo korporatsııasy retinde negizi qalanǵan.
Ár kezeń saıyn ózin jańartyp, óz salasynda izashar bolyp kele jatqan TRT Túrkııanyń kórý jáne estý jadysyna aınaldy.
«TRT 41 tilde jáne dıalektide taratqan efırleri jáne «TRT Germany», «TRT Russian», «TRT French», «TRT Balkan», «TRT Africa», «TRT Spanish» sandyq habar taratý platformalary men halyqaralyq jańalyqtardy álem jurtshylyǵyna usynady. Búgingi tańda TRT óziniń tele-radıo arnalary jáne halyqaralyq habar taratý toptarymen 7 qurlyqqa habar taratý jáne óndiris qyzmetin sátti túrde júzege asyrýda. 60 jyldyq tájirıbesimen durys jáne beıtarap qoǵamdyq habar taratýdyń jalǵyz mekenjaıy TRT túrik halqynyń úni bolýdy jalǵastyrýda», dep jazady túrkııalyq BAQ.
Sıannan Almatyǵa jolaýshylar poıyzy qatynaıdy – «Halyq gazeti»
Qytaıdyń Sıan qalasynan Almatyǵa jolaýshylar poıyzy qatynaıdy, dep habarlady «Halyq gazeti» qazaqstandyq «sputnik.kz»-ke silteme jasap.
Atalǵan aqparat kózderiniń keltirgen derekterine súıensek, «QTJ» UK» AQ, «Jolaýshylar tasymaly» AQ basshylary jáne Sıan qalasy úkimetiniń (QHR) delegatsııasy qyzmettik kezdesý barysynda Sıan qalasynan Almatyǵa halyqaralyq týrıstik jolaýshylar poıyzyn iske qosýdy uıymdastyrý máselesin talqylaǵan.
Týrıstik poıyz «Úrimji - Almaty-2» qatynasyndaǵy №103/104 jolaýshylar poıyzynyń kestesi boıynsha Qorǵas-Altynkól shekaralyq ótkeli arqyly júredi.
Aıta ketý kerek, bul poıyz Almaty-2 stantsııasynda birneshe kún turaqtaıdy. Osy ýaqyt ishinde qazaqstandyq tarap jolaýshylar úshin temirjol vokzalynda qaýipsizdik sharalaryn qoldanyp, mádenı is-sharalardy uıymdastyrýǵa kómek kórsetedi.
Tehrandaǵy Qazaqstan elshiliginde «Shańyraq» atty qazaq ulttyq buryshy ashyldy - Parstoday
Iran astanasy Tegerandaǵy Qazaqstan elshiliginde Naýryz meıramy men 1 mamyr – Birlik kúnine oraı merekelik shara uıymdastyrylyp, «Shańyraq» qazaq ulttyq buryshynyń ashylý rásimi ótti, dep habarlaıdy Irannyń «Parstoday» aqparat agenttigi.
Atalǵan BAQ-tyń habarlaýynsha, merekelik sharada Qazaqstannyń Irandaǵy jańa elshisi Ońtalap Ońalbaev myrza sóz sóılep, Qazaqstan men Irannyń saýda-ekonomıkalyq baılanystaryna toqtalyp, Qazaqstanda bolyp jatqan sý tasqynyna baılanysty birqatar halyqaralyq sharanyń onlaın formatta ótetinin, sý tasqynynan zardap shekkenderdiń bárine tolyq kómek beriletinin aıtqan. Sonymen birge naýryz meıramyn toılaýǵa arnalǵan «Naýryznama» atty jańa formattyń erekshelikterin sanamalap ótken. Soǵan sáıkes, Qazaqstan elshiliginiń ǵımaratynda qazaq halqynyń salt-dástúri, ádet-ǵurpy men qolóner buıymdaryn dáripteýge arnalǵan «Shańyraq» atty turaqty ulttyq buryshtyń ashylǵanyn jarııalaǵan.
Aıta keteıik, merekelik shara barysynda qazaqtyń áni aıtylyp, kúıi shertilip, bıi bılendi. Ulttyq oıyndar oınalyp, qonaqasy berildi.
Aral teńiziniń boıynda uıaly baılanys pen ınternet jelisi iske qosyldy - «ÓzA»
Týrısterge qolaıly jaǵdaı jasaý maqsatynda Aral teńizi jaǵalaýynda uıaly baılanys pen ınternet jelisi iske qosyldy.
Bul týraly ózbekstandyq «ÓzA» aqparattyq agenttigi habarlady.
Ózbekstandyq BAQ-tyń Qaraqalpaqstan Jýqorǵı Kengesıne silteme jasap habarlaýynsha, bul jaǵdaı Ózbekstan Prezıdentiniń 2024 jylǵy 9 aqpandaǵy sheshimi negizinde júzege asyrylǵan.
Keltirilgen derekterge súıensek, Qaraqalpaqstan Respýblıkasyn keshendi áleýmettik-ekonomıkalyq damýdy jáne halyqty jumyspen qamtýdy qamtamasyz etý jónindegi qosymsha sharalar týraly qaýlyǵa sáıkes 2024 jyldyń naýryz aıynda týrısterge qolaıly jaǵdaı jasaý maqsatynda uıaly baılanys operatorlarymen birlese jumys jasamaq. Sol arqyly Aral óńirin joǵary jyldamdyqty mobıldi ınternetpen qamtý múmkindigin zerdeleý jáne sáýir aıynda Aral óńirin joǵary jyldamdyqty mobıldi ınternetpen qamtamasyz etý týraly sheshim qabyldaǵan.
Sondaı-aq osy aptada «ÓzA»-da «Tashkentte Ózbekstan, Ázerbaıjan jáne Qazaqstan energetıka mınıstrleriniń ekinshi keńesi ótti» degen taqyryptaǵy aqparat jarııalandy.
Keltirilgen derekterge súıensek, Tashkent qalasynda Ózbekstan, Ázerbaıjan jáne Qazaqstan energetıka mınıstrleriniń ekinshi kezdesýi ótken.
ÓR Energetıka mınıstrliginiń habarlaýynsha, sharada «Ózbekstan-Qazaqstan-Ázerbaıjan energetıkalyq júıeleriniń ózara baılanysy jobasynyń («Jasyl dáliz») tusaýkeseri ótti.
«Konferentsııada Ázerbaıjan, Qazaqstan jáne Ózbekstannyń energetıkalyq sektorlaryn qosý arqyly aımaqta óndiriletin jasyl energııany Eýropaǵa eksporttaý jobasynyń aldyn ala tehnıkalyq-ekonomıkalyq negizdemesin bekitý, tehnıkalyq-ekonomıkalyq negizderin zertteý úshin halyqaralyq keńesshilerdi tartý máselelerin qaraý, joba boıynsha memleketaralyq kelisimniń jobasyn daıyndaý jáne basqa da máseleler talqylandy», dep jazady «ÓzA».
Sonymen qatar «ÓzA» aqparat agenttiginde «Ózbek mýltfılmi Qazaqstanda ótken festıvalde birinshi oryn aldy» degen taqyryptaǵy aqparat jaryq kórdi.
Ózbekstandyq basylymnyń málimetinshe, Qazaqstannyń Almaty qalasynda ótken birinshi halyqaralyq «Farabi Film Festival» sharasynda jas ózbek mýltıplıkatory Djamshıd Atambaevtyń «Saǵynysh» mýltfılmi «Úzdik anımatsııalyq fılm» atalymynda birinshi oryn alǵan.
Ulttyq kınematografııany damytý ortalyǵynyń habarlaýynsha, Jamshıd Atambaev qazir Ózbekstannyń Memlekettik óner jáne mádenıet ınstıtýtynyń stýdenti jáne kınematografıst ári rejısser Iqbol Melıqozıevtiń shyǵarmashylyq sheberhanasynyń stýdenti eken.
Aıta keteıik, bul anımatsııalyq kartına Djamshıd esimdi jas jigittiń óziniń jáne anasynyń armandaryn oryndaý jolyndaǵy oqıǵasyn baıandaıdy. Fılmniń negizgi ıdeıasy – analardy qadirleýge baǵyttalǵan.
