Baýyrjan Omarulynyń jýrnalıstıka maıtalmandaryna arnalǵan jańa kitaby jaryq kórdi
Tanymal jýrnalısterdiń ónegeli ómir joldaryna úńilsek, qandaı ǵıbratty kóremiz? Jazýshy, jýrnalıst, Qazaqstan Respýblıkasy Ulttyq Ǵylym akademııasynyń korrespondent-múshesi, fılologııa ǵylymdarynyń doktory, professor Baýyrjan Omarulynyń «Tórtinshi bılik» atty jańa kitabynda qalam ıeleriniń qyr-syry jan-jaqty ashyla túsedi. Aqparat áleminde ózindik iz qaldyrǵan sóz sheberleriniń ómir joldary, bastan keshken qyzyqty oqıǵalary, el úshin atqarǵan qaltqysyz qyzmetteri baıandalady.
Osy kitapqa alǵysóz jazǵan «Nur Otan» partııasy Tóraǵasynyń birinshi orynbasary, Memlekettik syılyqtyń laýreaty Muhtar Qul-Muhammed: «Keńes zamanynda «partııanyń qolbalasy» degen kemsitý maqsatymen berilgen baǵanyń ózine máz bolǵan jýrnalıster qaýymy táýelsizdik jyldary «tórtinshi bılik ókilderi» degen susy da, mysy da basymdaý ataýdy ıelendi. Dúnıejúziniń birde-bir eliniń zańnamasynda dál osyndaı resmı uǵym bolmasa da, sóz bostandyǵy qalyptasqan memleketterdegi buqaralyq aqparat quraldarynyń kúsh-qýaty aıryqsha baǵalandy»,- dep atap ótken eken.
Qalam ıeleri tipti atqarýshy, zań shyǵarýshy, sot bıligi ókilderiniń aýzymen qus tistegen nebir serkelerin op-ońaı táýbesine keltirip, tutas bir memlekettiń ǵana emes, jer-jahannyń nazaryn ózine aýdaratyn aıtýly máselelerdi erkin kótere alatyn asa yqpaldy kúsh sanalatynyn jazady.
Aıta ketý kerek, jańa kitapqa toqsannyń tórine taıanǵanda qalamdy kompıýterge almastyryp, mamandyǵyna adaldyǵynan aınymaǵan Ázilhan Nurshaıyqov, ulttyq jýrnalıstıkada tutas mektep qalyptastyryp, qazaq tildi baspasózdiń aıbynyn asyrǵan Sherhan Murtaza, totalıtarlyq zamannyń ózinde-aq aqyryp teńdik suraǵan Nurmahan Orazbek, ulttyq telearnanyń negizin qalaýshylardyń biri Sultan Orazalınov, aýdandyq baspahananyń gazet basýshysynan Aqparat mınıstrine deıin ósken Qýanysh Sultanov, elimizdiń bas basylymynyń basshysy bolǵan Saýytbek Abdrahmanov, aqparat pen ǵylymnyń tizginin qatar ustaǵan Jumaǵalı Ysmaǵulov pen Ýálıhan Qalıjanov, qazaq jýrnalıstıkasynyń teorııasy men praktıkasyn qalyptaǵan ustaz-professorlar Taýman Amandosov pen Namazaly Omashov jáne basqalardyń tulǵalary arqaý bolǵan.
Qalamgerler týraly maqalalar jazýǵa qalaı kelgeni týraly B.Omaruly jýrnalıstik kásiptiń jurt bile bermeıtin qyrlary men syrlaryn elge tanytýdy maqsat tutqanyn atap ótken. Osy kitapqa arqaý bolǵan jazýshy-jýrnalısterge tańdaý jasaǵany jaıly da syr bólisedi.
«Aqparat aıdynynda óshpes izi qalǵan basqa da maıtalmandar bar emes pe?! Árıne! Jetkilikti. Biraq kitap keıipkerleriniń tynys-tirshiligi, shyǵarmashylyq bolmysy, jazý máneri, oılaý daǵdysy tabıǵatymyzǵa jaqyndaý boldy-aý deımin. Sondyqtan muny avtordyń jýrnalıstik antologııasy dep baǵalaǵan jón shyǵar. Jazam degen adamǵa keıipker jetedi. Jalpaq jurtqa keń tanylǵan alymdy aqparatshylar barshylyq. Qalamdastarymyz da ózderiniń áriptesteri týraly qalam tartsyn. Sóıtip, kópke tanytqan kásibimizdi kókke kótereıik. Jýrnalısterdiń ozyq ókilderi tórtinshi bıliktiń aıasynan shyǵyp, memlekettik bıliktiń bıik belesterine deıin órledi. Mańyzdy máselelerdi sheshti. Adam taǵdyryna arasha tústi», - dep oı tolǵaıdy Baýyrjan Omaruly.
Aıtalyq, Ázilhan Nurshaıyqovtyń jan dúnıesin ashýǵa arnalǵan «Dáýir dápteri» taraýynda avtor belgili jazýshynyń jaqsy qasıetterine jeke-jeke toqtalǵan. «Jazǵanyna syn kózben qaıta úńiletin. Keıbir kóńili tolmaǵan tirkesterdi óńdep, óńin kirgizetin, jóndep, jandandyra túsetin. Halyq jazýshysy halyqtyń talǵamyn eshqashan umytpaıtyn»,- deıdi kitap avtory.
Kásibı jýrnalıst B.Omarulynyń bul kitaby qyzyǵy men qıyndyǵy qatar júretin jýrnalıstik mamandyqty tańdaǵan jastar men qalyń oqyrman qaýym úshin óte baǵaly desek, artyq aıtqandyq bolmas. 21 baspa tabaqtan turatyn «Tórtinshi bılik» kitaby Almaty qalasyndaǵy «Arna» baspasynan jaryq kórgen.
