Baýyrjan Baıbek estrada juldyzdaryna Ýnıversıada Elshisi sertıfıkatyn tabystady

ALMATY. QazAqparat - Búgin Almatyda 2017 jylǵy 28-shi qysqy Dúnıejúzilik Ýnıversıadanyń bastalýyna 100 kún qalýyna oraı uıymdastyrylǵan sharada qala basshysy Baýyrjan Baıbek Qazaqstan estrada juldyzdaryna Ýnıversıada Elshisi sertıfıkatyn tabys etti, dep habarlady «QazAqparat» tilshisi.

Halyqaralyq stýdentter oıyndarynyń resmı ókili bolyp, QR Eńbek sińirgen mádenıet qaıratkeri Qydyráli Bolmanov, ánshi Janar Doǵalova, Álı Oqapov pen «Jańa tolqyn-2009» laýreaty Nurjan Kermenbaev tanystyryldy. Qala basshysy Baýyrjan Baıbek saltanatty sharada olarǵa sertıfıkattaryn tabys etti.

Aıta keteıik, sondaı-aq búgin Ýnıversıadanyń bastalýyna 100 qalǵanyna oraı uıymdastyrylǵan saltanatty sharada halyqaralyq stýdentter oıyndarynyń ánurany tanystyryldy.

Ánuran avtory Islam Raqymjanov búgin alǵash ret ýnıversıada ánuranyn ánshi Nurlan Abdýllın jáne Lorenmen birge oryndady.

Eske sala keteıik, Búkilálemdik qysqy Ýnıversıada 2017 jyly 29 qańtar men 8 aqpan aralyǵynda Almaty qalasynda ótedi. Qazirgi tańda 58 memleket jarysqa qatysatynyn rastady. Ýnıversıadada sporttyń 12 túri boıynsha 86 medaldar jıyntyǵy utysqa salynady. Sondaı-aq, jarystar 8 sporttyq nysanda: «Almaty Arena» jáne «Halyq Arenadan» bólek, «Shymbulaq», «Medeý», «Suńqar» tramplıni, B. Sholaq a1tyndaǵy Sport saraıy, «Alataý» shańǵy-bıatlon stadıony jáne Almaty oblysyndaǵy  «Tabaǵan» kesheninde ótedi.

Ýnıversıadaǵa arnalyp, Almatyda 3 jańa nysan salynǵan: 12 myń oryndyq «Almaty Arena», 3 myń adamdyq «Halyq arena» jáne 5 myń orynǵa arnalǵan Atletter qalashyǵy. Bul nysandardyń barlyǵy merziminen eki aıǵa erte qoldanysqa berildi.