Baýyrjan Qudaıbergenov ulttyq ekonomıka vıtse-mınıstri qyzmetinen bosatyldy
ASTANA. KAZINFORM - Qazaqstan Respýblıkasy Úkimetiniń qaýlysymen Baýyrjan Qudaıbergenov basqa jumysqa aýysýyna baılanysty QR Ulttyq ekonomıka vıtse-mınıstri qyzmetinen bosatyldy.
Bul týraly QR Úkimetiniń baspasóz qyzmeti habarlaıdy.
Baýyrjan Qudaıbergenov 1988 jyly dúnıege kelgen. L.N. Gýmılev atyndaǵy Eýrazııa ulttyq ýnıversıtetin, M. Áýezov atyndaǵy Ońtústik Qazaqstan memlekettik ýnıversıtetin, Manchester ýnıversıtetin, (Ulybrıtanııa) jáne Nazarbaev ýnıversıtetin támamdaǵan.
Eńbek jolyn Respýblıkalyq bıýdjettiń atqarylýyn baqylaý jónindegi esep komıteti Taldaý jáne aqparattandyrý bóliminiń ınspektory bolyp bastady.
2012-2017 jyldary Respýblıkalyq bıýdjettiń atqarylýyn baqylaý jónindegi esep komıteti qurylymynda sarapshy-aýdıtor, bas sarapshy-memlekettik aýdıtor qyzmetterin atqarǵan.
2018-2022 jyldary QR Prezıdenti Ákimshiliginiń Áleýmettik-ekonomıkalyq monıtorıng bóliminde, QR Tuńǵysh Prezıdenti Keńsesiniń Aqparattyq-taldamalyq qamtamasyz etý bóliminde túrli laýazymdarda qyzmet etti.
2022 jylǵy aqpannan bastap QR Premer-Mınıstriniń keńesshisi boldy.
2023 jyldyń 27-shi maýsymynda QR Ulttyq ekonomıka vıtse-mınıstri laýazymyna taǵaıyndaldy.
«Bolashaq» stıpendııasynyń ıegeri, 2021 jylǵy Prezıdenttik jastar kadr rezerviniń múshesi.
Osyǵan deıin Mıras Tólebaevtyń Týrızm jáne sport vıtse-mınıstri qyzmetinen bosatylǵany týraly jazdyq.