Baýyr men qýyqasty beziniń qaterli isigin anyqtaýǵa arnalǵan fıýjn-bıopsııa ádisi engizildi
ASTANA. KAZINFORM – Ulttyq ǵylymı onkologııa ortalyǵynda Qazaqstan úshin biregeı — fıýjn-bıopsııa ádisi engizildi. Bul — kúrdeli vızýalızatsııany qajet etetin jaǵdaılarda qaterli isikterdi asa dál anyqtaýǵa múmkindik beretin ınnovatsııalyq dıagnostıkalyq protsedýra.
— Bul ádistemeni engizý ortalyqtyń zamanaýı medıtsınalyq qural-jabdyqtarmen jabdyqtalýynyń arqasynda múmkin boldy. Bizde ýltradybystyq zertteýdiń sońǵy úlgidegi skanerleri bar. Olar osyndaı kúrdeli, biraq óte qajetti tehnologııany qoldanýǵa jol ashady, — deıdi ÝDZ jáne fýnktsıonaldyq dıagnostıka ortalyǵynyń meńgerýshisi, joǵary sanatty dáriger, medıtsına magıstri Dámesh Orazbaeva.
Fıýjn-bıopsııa degen ne?
Bul ádiste MRT nemese KT arqyly aldyn ala túsirilgen sýretter naqty ýaqyttaǵy ÝDZ keskinimen biriktiriledi. Osylaısha dáriger kúdikti isikti naqty anyqtap, ıne arqyly dál sol jerden tin alady. Bul — qateni azaıtyp, dıagnozdy naqtylaýǵa kómektesedi.
— Bul ádistiń basty artyqshylyǵy — joǵary dáldik pen asqynýlardyń sırek kezdesýi. Ásirese, tereń ornalasqan nemese ÝDZ-de jaqsy kórinbeıtin isikterdi anyqtaýda óte tıimdi, — deıdi shaqyrylǵan mentor, onkolog dáriger Vıktorııa Şerbına.
Fıýjn-bıopsııa kelesi jaǵdaılarda qoldanylady:
— ÝDZ-de kórinbeıtin baýyr isikterine kúdik týyndaǵanda;
— qýyqasty bezi qaterli isiginiń kúrdeli túrlerinde.
Qýyqasty beziniń klassıkalyq bıopsııasy (keminde 12 úlgi alý) shamamen 30% jaǵdaıda jalǵan teris nátıje berýi múmkin. Al fıýjn-bıopsııa ádisi MRT arqyly kúdik týdyrǵan naqty aımaqtan materıal alýǵa múmkindik beredi.
Aıta ketý kerek, bul ádisteme tek tehnıkalyq quraldardy ǵana emes, sonymen qatar joǵary deńgeıli biliktilikti talap etedi.
Dáriger ÝDZ, KT jáne MRT salalaryndaǵy bilimdi sıntezdeı alýy kerek, sondaı-aq keńistiktik oılaý qabileti bolýy qajet. UǴOO mamandary tıisti oqytýdan ótip, bul ádisti senimdi túrde qoldana bastady. Endi baýyr men qýyqasty bezi obyryn dıagnostıkalaýda fıýjn-bıopsııany klınıkalyq tájirıbege turaqty túrde engizý josparlanyp otyr.
Aıta ketelik Almatyda jasandy júrekpen ómir súrip júrgen naýqastyń tizesine ota sátti jasaldy.