Batysqazaqstandyqtar Jeńis kúnin keńinen atap ótti
Oral qalasynda Jeńis alańyna jınalǵan maıdangerlerdi, tyl eńbekkerlerin jáne barsha jurtshylyqty oblys ákimi Altaı Kólginov quttyqtap, bárine de beıbit aspan astynda baqytty da uzaq ǵumyr súrýine tilektestigin bildirdi.
Uly Otan soǵysyndaǵy Jeńisti jaqyndatýǵa Batys Qazaqstan oblysynyń halqy da súbeli úlesin qosty. KSRO-nyń kóptegen jerlerin nemis fashısteri basyp alǵandyqtan, soǵys kezinde Qazaqstan aýmaǵyna 142 kásiporyn, sonyń ishinde Oral qalasyna 14 iri óndiris oshaǵy kóshirildi. Oǵan qosa jańa ónerkásip nysandary da jedel iske qosylyp, maıdanda jaýyngerler jaýmen aıanbaı shaıqassa, tylda barsha halyq kún-tún demeı, eńbek etti. Oralda áskerı gospıtaldar ornalastyrylsa, Batys Qazaqstan oblysynyń Orda (qazirgi Bókeı ordasy), Jánibek aýdandary Stalıngrad maıdanynyń taıaý tylyna aınalyp, soǵys jaǵdaıynda dep jarııalandy. Saıqyn, Jánibek, Shońaı stansalaryn jaý ushaqtary bombalap, jaýyngerler óz aldyna, talaı tyl adamdaryn da mert qyldy. Qysqasy, óńir turǵyndary soǵys demin aıqyn sezinip, «Bári de jeńis úshin!» degen uranmen eńbek etti.
Saltanatty jıynnan keıin Máńgilik alaýǵa gúl shoqtary qoıyldy.
Qalalyq mádenıet jáne demalys saıabaǵynda ardagerlerge Uly Jeńistiń 72 jyldyǵyna oraı merekelik kontsert qoıyldy. Sodan keıin olar sarbaz botqasynan dám tatty.
«Jeńis bizge ońaılyqpen kelgen joq. Ol úshin qanymyzdy da, janymyzdy da aıaǵan joqpyz. Jeńis kúnine jete almaı, qyrshyn ketkender qanshama! Biz olardyń beınesin eshqashan umytpaımyz. Qazirgi tańda qatarymyz seldirep, kún sanap azaıyp jatyr. Bizge qamqorlyq-qoldaý kórsetip otyrǵan Elbasyna rızamyz. Eń bastysy, elimiz aman bolyp, odan ári órkendeı bersin», dedi soǵys jáne eńbek ardageri, kóp jyldar boıy M.Ótemisov atyndaǵy Batys Qazaqstan memlekettik ýnıversıtetinde ustazdyq etken tarıh ǵylymdarynyń kandıdaty Qalam Súıinshálıev.
Bul kúni oblys ortalyǵy men aýdandarda basqa da mádenı sharalar uıymdastyryldy. 
