Batysqazaqstandyqtar Qadyr Myrza Álıdiń týǵan kúnin atap ótti

ORAL. QazAqparat - Búgin Oralda qazaqtyń uly aqyny, Qazaqstan halyq jazýshysy, Memlekettik jáne táýelsiz «Tarlan» syılyǵynyń ıegeri Qadyr Myrza Álıdiń týǵan kúni keńinen atalyp ótildi, dep habarlaıdy «QazAqparat» HAA tilshisi.  

Qadyr atyndaǵy mádenıet jáne óner ortalyǵynda uıymdastyrylǵan sharalar aldymen aqyn eskertkishine gúl shoqtaryn qoıýmen bastaldy. Sodan keıin ortalyq zalynda «Óz dáýiriniń aınasy» atty ádebı-mýzykalyq keshte Qadyr óleńderi oqylyp, sózderine jazylǵan ánder oryndaldy. Sondaı-aq Qadyr Myrza Álı atyndaǵy qoǵamdyq qordyń uıytqy bolýymen aqyn haqynda «Qazaqfılm» kınostýdııasy túsirgen «Máńgi maıdan sarbazy» atty derekti fılm Oralda alǵash ret kórsetildi.

 

Shara barysynda belgili aqyn, Qazaqstan Jazýshylar odaǵy BQO bólimshesiniń tóraıymy Aqushtap Baqtygereeva, ólketanýshy Jaısań Aqbaı, oblystyq mádenıet, muraǵattar jáne qujattama basqarmasynyń basshysy Dáýletkereı Qusaıynov, Qadyr atyndaǵy qoǵamdyq qordyń dırektory, kompozıtor-ánshi Donedil Qajymov jáne basqalar óz estelikterimen bólisip, Qadyrdaı uly aqyndy eske alý jumystarynyń aldaǵy ýaqytta da jalǵasatynyn jetkizdi.

 

Aqynǵa arnalǵan sharalar týǵan jeri Syrym aýdanynda da uıymdastyryldy. Jympıty aýylyndaǵy Qadyr eskertkishine gúl shoqtary qoıylyp, eńbek ardageri, Syrym aýdanynyń qurmetti azamaty Kım Fedıanın esteligin aıtsa, Qadyr Myrzalıev atyndaǵy mektep oqýshylary aqyn óleńderin oqydy.  Budan keıin aqyn atyndaǵy mektepte «Qazynaly Qadyr álemi» atty ǵylymı-tájirıbelik konferentsııa ótip, jınalǵandar kemeńger tulǵa týraly óz oı-pikirlerimen bólisti.