Batysqazaqstandyq ǵalymdar Jáńgir hannyń izi qalǵan óńirdi zerttemek
«Kıeli jerler geografııasy» jobasy aıasynda Jáńgir han atyndaǵy Batys Qazaqstan agrarlyq-tehnıkalyq ýnıversıteti uıymdastyryp otyrǵan joryq maqsaty - BQO-nyń Jánibek aýdanymen shektesetin Volgograd oblysy Pallasov aýdany aýmaǵynda bolyp, Jáńgir hannyń izi qalǵan tarıhı oryndardy zertteý.
Ekspedıtsııa jetekshisi, ýnıversıtet janyndaǵy Jáńgir han mýzeıiniń meńgerýshisi Nurjan Tólepovtiń aıtýynsha, ǵalymdar Kýmysolechebnıtsa eldi mekeni mańyndaǵy «Han bógetine», basqa da kóne oryndarǵa baryp, tarıhı derekterdi, ańyz áńgimelerdi jınastyrady. Tarıhı eskertkishtermen qatar tabıǵı oryndar nazardan tys qalmaıdy. Qulpytastar da sýretke túsirilmek.
Jáńgir han - ákesi Bókeıden keıin Bókeı handyǵyn 1824-1845 jyldary basqarǵan belgili tulǵa. Ol 1826 jyldan bastap qazirgi Bókeı ordasy aýdany Han ordasy aýylynda Jasqus qumynyń eteginen óz ordasyn saldy. Qazaqtar arasynda otyryqshylyq turmysty engizip, tuńǵysh ret mektep, dárihana sekildi qajetti nysandar turǵyzdy. Bul onyń qys qystaýy bolsa, han qazirgi kezde Volgograd oblysy aýmaǵyndaǵy Tarǵyn ózeni boıynan jazǵy ordasyn salǵyzdy. Ózi de osy jerden ómirden ótti. 
Al Kýmysolechebnıtsa dep atalatyn mekende ataqty aqyn Sháńgereı Bókeevtiń qos qabatty úıi ornalasqan-dy. Bul tarıhı mekende Baqytjan Qarataev, Eleýsin Buırın, Ǵumar Qarash syndy Alash qaıratkerleri bas qosyp, 1911 jyly «Qazaqstan» gazetin shyǵarýdy uıǵardy.
Birneshe kúnge sozylatyn ekspedıtsııa qorytyndysyna sáıkes arnaıy jınaqtar jaryq kórmek.
Eske sala keteıik, bul - atalmysh ýnıversıtet «Rýhanı jańǵyrý» baǵdarlamasy aıasynda qolǵa alǵan osyndaı ekinshi shara. Budan buryn Inderge deıingi ekspedıtsııa barysynda tyń oljalar tabylǵanyn jazǵan bolatynbyz.
