Batys Qazaqstanda jasóspirimder qylmysy eki esege ósken
Oral qalalyq polıtsııa basqarmasy ıývenaldyq polıtsııa bólimshesiniń bastyǵy, polıtsııa podpolkovnıgi Mádına Quspanovanyń óńirlik kommýnıkatsııalar qyzmeti alańynda ótken brıfıngte málim etkenindeı, óńirde jasóspirimder arasyndaǵy krımınogendik jaǵdaı alańdaýshylyq týǵyzýda.
Onyń aıtýynsha, ótken jyly osy merzimde 12 qylmys tirkelse, bıyl jyl basynan beri 26 derekke jetip otyr.
Munyń kópshiligi – múliktik sıpattaǵy qylmystar. Atap aıtqanda, 15-i – urlyq, jeteýi – alaıaqtyq, ekeýi – tonaý. ıAǵnı jasóspirimder paıda tabý úshin osyndaı qylmystarǵa barady. Kóbinese aqsha nemese uıaly telefondar jymqyrylady.
Osy qylmystardy jasaǵany úshin 18 jasóspirim ustalsa, sonyń bireýi – mektep oqýshysy, 11-i – kolledj stýdenti, altaýy – esh jerde oqymaıtyn, jumys jasamaıtyn kámeletke tolmaǵandar.
«Jasóspirimderdiń qylmys jasaýynyń negizgi sebepteri – zańdy ókilder tarapynan baqylaýdyń joqtyǵy, ata-analardyń óz mindetterin tıisti deńgeıde oryndamaýy. Oǵan qosa balalardyń tolyq emes nemese qolaısyz otbasylarda tárbıelenýi de yqpal etedi. Sondyqtan bala tárbıesine jaýapkershilikpen qarap, olardyń bos ýaqyttaryn durys uıymdastyrýǵa basa mán berý kerek», dedi M.Quspanova.
Sonymen qatar spıker balalardyń úıden óz betimen ketý derekteriniń de jıilep ketkenin atap ótti. Jyl basynan beri osyndaı 6 derek tirkelip, polıtsııa qyzmetkerleriniń úılesimdi qyzmeti nátıjesinde barlyq balalar tabylyp, úılerine qaıtaryldy.
Jyl basynan beri ákimshilik quqyq buzýshylyq jasaǵan 600-den astam jasóspirim ustalsa, olardyń deni nemese 497-si – zańdy ókilderinsiz túnde óz betimen júrgender. 28-i usaq buzaqylyqqa barsa, 20-sy qoǵamdyq orynda mas bolǵan.
Brıfıngte sondaı-aq BQO bilim basqarmasy basshysynyń orynbasary Lýara Batyrǵalıeva bilim berý mekemelerinde kámeletke tolmaǵandar arasynda quqyqbuzýshylyqtyń aldyn alý máselelerine toqtaldy.
