Batys Qazaqstanda vaktsına alǵandar sany 246 myńnan asty

ORAL. QazAqparat – Batys Qazaqstan oblysynda 246 010 adam vaktsınanyń birinshi komponentin saldyrdy, dep habarlaıdy QazAqparat tilshisi.

BQO densaýlyq saqtaý basqarmasy basshysynyń orynbasary Gúlnár Ábdirahmanovanyń málim etkenindeı, bul – oblys boıynsha egilýge tıisti turǵyndardyń 59,4 paıyzy.

Egilgenderdiń basym kópshiligi (176 537) reseılik «Spýtnık V» vaktsınasyn qolaı kórdi.

Sondaı-aq 226 260 adam ekinshi komponentti de qabyldady.

Qazirgi kezde óńirde vaktsınatsııalaý jumysy jalǵasýda.

G.Ábdirahmanovanyń sózine qaraǵanda, pandemııa bastalǵannan beri koronavırýs juqtyrǵan 39 503 naýqastyń 93,3 paıyzy (36 856) jazylyp shyqty. Solardyń ishinde 14 931-i ınfektsııalyq statsıonarlarda, 21 925-i úılerinde emdeldi. Kúni búginge deıin 832, sonyń ishinde bıyl 663 adam koronavırýstan qaıtys boldy.

«Qazirgi kezde oblysta 337 naýqas ambýlatorlyq em alýda. Solardyń 72 paıyzynda aýrý jeńil ótýde. 16 paıyzy – ortasha, 12 paıyzy – sımptomy joqtar. Sonymen qatar 821 tósektik 16 ınfektsııalyq statsıonarda 142 adam em qabyldap jatyr. Aýyr haldegi 9-y jansaqtaý bólimshesinde. 6 naýqas ınvazıvti emes jasandy tynys alý apparatyna qosylǵan», dedi G.Ábdirahmanova.

Eske sala keteıik, budan buryn Batys Qazaqstanǵa 29 250 doza Pfizer vaktsınasy jetkizilgenin, óńirde balalar arasynda tumaýǵa shaldyǵý jıilegenin jazǵan bolatynbyz.