Batys Qazaqstanda sibir eligin atqan brakonerler ustaldy
BQO orman sharýashylyǵy jáne janýarlar dúnıesi aýmaqtyq ınspektsııasynan túsken málimetke qaraǵanda, óńirde osyndaı eki oqıǵa tirkeldi.
Inspektsııa qyzmetkerleri Aqjaıyq orman jáne janýarlar dúnıesin qorǵaý jónindegi memlekettik mekemesiniń ınspektorlary jáne Aqjaıyq polıtsııa bólimi qyzmetkerlerimen birlese júrgizgen reıd barysynda Aqjaıyq aýdany Kónekketken aýyldyq okrýgi aýmaǵyndaǵy orman alqabynda zańsyz ań aýlaý deregin ashty. Tórt adamnan turatyn brakonerler toby qolǵa tústi. Oqıǵa ornynan oqtyń izderi bar eki sibir eliginiń ushasy, atylǵan 6 dana gılza, «IJ-43» markaly ańshy myltyǵy tárkilendi. Ustalǵandardan jaýap alyndy.
Atalǵan derek boıynsha QR QK 337-baby 3-bóligine (zańsyz aýlaý) sáıkes tergeý amaldary júrgizilýde.
Taǵy bir osyǵan uqsas oqıǵa Báıterek aýdany aýmaǵynda boldy. Inspektsııa qyzmetkerleri men «Ohotzooprom» ÓB» RMQK Batys Qazaqstan fılıaly ınspektorlary, sondaı-aq BQO polıtsııa departamenti patrýldik polıtsııa batalony qyzmetkerlerimen birlesken shara barysynda Oral-Atyraý jolynyń 67-shaqyrymynda Býdarın memlekettik zooqoryǵynda zańsyz ań aýlady dep kúdikke ilingen tórt adam otyrǵan eki avtokólik ustaldy.
Oqıǵa ornynan tirkelgen 4 ańshy myltyǵy, oq-dáriler, balta, pyshaq, tros jáne jeke zattar tárkilendi. Joldan alys emes jerden polıetılendi qapqa bólshektelip salynǵan janýar (aldyn ala joramal boıynsha sibir eliginiń) eti tabyldy.
Ony brakonerler qashqan kezde avtokólikten laqtyryp úlgergen. Avtokólikter Báıterek aýdany polıtsııa bóliminiń turaǵyna qoıyldy.
Bul derek boıynsha da QR QK 337-baby 1-bóligine sáıkes tergeý júrgizilýde.
BQO polıtsııa departamentiniń baspasóz qyzmeti osy eki qylmystyq is boıynsha brakonerlerdiń anyqtalǵanyn jetkizdi.
Olardan eshqaıda ketpeý jóninde qolhat alyndy. Qazirgi kezde saraptama taǵaıyndalyp, tergeý jalǵasýda.