Batys Qazaqstanda kıik sanynyń ósýine baılanysty ony qorǵaý da qıyndap otyr
BQO orman sharýashylyǵy jáne janýarlar dúnıesi aýmaqtyq ınspektsııasy basshysynyń orynbasary Zakarııa Turalıevtiń brıfıngide málim etkenindeı, 2019 jylǵy áýe sanaǵy nátıjesinde óńirdegi kıik sany 217 myńǵa jetken.
Bıyl tótenshe jaǵdaı men karantınge baılanysty áýe sanaǵy júrgizilgen joq. Degenmen mamandardyń topshylaýynsha, kıikterdiń sany 2-2,5 esege óskeni baıqalady.
Jaıyq kıik popýlıatsııasyna jatatyn aqbókender oblystyń Aqjaıyq, Qaztalov, Jánibek, Bókeı ordasy, Jańaqala jáne Tasqala aýdandaryn mekendeıdi. Ústirt tobyna jatatyn kıikter Syrym, Shyńǵyrlaý, Qaratóbe aýdandarynda azdap kezdesedi. Kıik únemi kóship-qonyp júretindikten, keıde Reseıdiń Saratov, Volgograd oblystary aýdandarynyń jerine de ótip ketip jatady.
Z.Turalıevtiń sózine qaraǵanda, osylaısha kóship-qonyp júretin kıikterdi baqylaý da qıyn emes. Ár 15 kún saıyn aýysyp turatyn, 20 adamnan turatyn 4 ınspektorlyq top 8 avtokólikpen bárin qamtı almaıdy. Kıikter 5 myńnan 20 myń basqa deıin toptalyp júredi. Al 100-200 bastan turatyn shaǵyn toptar qadaǵalaýsyz qalyp qoıady.
«Qazirgi tańda «Ohotzooprom» ÓB» RMQK-nyń oblystaǵy fılıalynda 53 qyzmetker bar, bul az. Sondyqtan ınspektorlar sanyn kóbeıtý jóninde Orman sharýashylyǵy jáne janýarlar dúnıesi komıteti men atalǵan kásiporyn basshylyǵyna hat jiberildi. Sondaı-aq «Bókeıorda» memlekettik rezervaty qurylsa, kıikti qorǵaý máselesin jeńildeter edi», - dedi Z.Turalıev.
Kıikterdi brakonerlerden qorǵaý máselesi de kún tártibinen túsken joq. Eger 2018 jyly – 43, ótken jyly 26 qylmystyq is qozǵalsa, bıyl jyl basynan beri 18 qylmys ashyldy.
Quqyq buzýshylardan bıyl 305 kıik ushasy men 1280 dana múıiz tárkilendi. Memleketke 1,3 mlrd astam shyǵyn keldi.