Batys Qazaqstanda eki kúnde myńǵa jýyq túlek UBT tapsyrdy
BQO bilim basqarmasynyń baspasóz qyzmeti málim etkenindeı, alǵashqy kúni Jańaqala men Jánibek aýdandarynda UBT synaǵy ótkizildi.
Testileý pýnktterinde sanıtarlyq-epıdemıologııalyq talaptar oryndaldy. Qoǵamdyq tártipti saqtaý maqsatynda kezekshilik, UBT pýnktterine jetkizý úshin 142 oqýshyǵa tasymal uıymdastyryldy.
Tapsyrýǵa nıet bildirgen 198 túlektiń 193-i synaqtan ótti. 1 túlek óz erkimen bas tartsa, tyıym salǵan zattardy alyp ótýge tyrysqany jáne UBT erejelerin buzǵany úshin 4 talapker test tapsyrý múmkindiginen aıyryldy.
23 maýsym kúni oblysta Jańaqala, Jánibek, Aqjaıyq, Bórli, Syrym, Qaztalov jáne Oral qalasynda Jáńgir han atyndaǵy Batys Qazaqstan agrarlyq-tehnıkalyq ýnıversıtetinde úmitkerler synnan ótti.
Túlekter aldymen dezınfektsııalyq tonnelden ótip, dene qyzýyn ólshetip, medıtsınalyq maska jáne qolǵappen qamtamasyz etildi.
Ekinshi lekke qatysýy tıis 794 túlektiń 9-y test tapsyrýǵa kelmedi. Tyıym salynǵan zattardy alyp ótýge tyrysqan 6 talapker synaqqa jiberilmedi.
Testileý kezinde uıaly telefondy paıdalanǵany úshin Oral qalasy, Syrym, Bórli, Jánibek jáne Qaztalov aýdandarynda 9 talapker aýdıtorııadan shyǵaryldy. Tártip buzǵandardan bólek, taǵy bir talapker densaýlyq jaǵdaıyna baılanysty UBT-ny basqa kúni, saýyqqan soń tapsyrady.
Osylaısha, ekinshi kúni 769 túlek testileýden ótti.
Óńirde UBT odan ári jalǵasýda.
Eske sala keteıik , budan buryn BQO-da 4300-den astam túlektiń UBT tapsyrmaqshy ekendigin jazǵan bolatynbyz.
