Batys Qazaqstanda egiz jigitter erekshe nómir satyp aldy
«Azamattarǵa arnalǵan úkimet» memlekettik korporatsııasy BQO boıynsha fılıalynyń PR-menedjeri Aqnur Nurǵalıevanyń málim etkenindeı, jyl basynan beri «joǵary suranysqa ıe» avtokólik nómirlerin 329 adam alǵan.
Kólik satyp alarda azamattar kólikke arnaıy memlekettik nómir alýy tıis. Eger qyzmet alýshy erekshe nómirli kóliktiń tizginin ustaǵysy kelse, onda quny qymbattaý turatyn «joǵary suranysqa ıe» nómirdiń birin tańdaıdy.
Ádettegi qarapaıym nómirdiń quny – 2,8 AEK, ıaǵnı 8 168 teńge. Suranysqa ıe nómirler quny jaǵynan alty sanatqa bólinedi. 777, 007, AAA nemese ZKO syndy túrli tsıfrlyq belgiler arasyndaǵy «ádemi» nómirlerdiń eń tómengi quny - 166 269 teńge, eń qymbaty - 831 345 teńge. Mamandandyrylǵan HQO-ǵa júgingen kezde usynylǵan nómirlerdiń tiziminen unaǵanyn tańdaý erki bar.
A.Nurǵalıevanyń aıtýynsha, erekshe nómirli bolǵandar arasynda egiz jigitter - Aslan men Jasulan Napıhonovtar bar. Olar 070 QOO 07 jáne 707 QOO 07 nómirdi tańdaǵan, ıaǵnı ekeýiniń árip belgisi uqsas. Eki nómirdiń baǵasy – 300 myń teńge. Sol sekildi Azamat degen júrgizýshi 666 TOR 07 degen nómirdi alǵan (quny – 580 myń teńge). Mundaǵy TOR sózi ejelgi qudaılarǵa qatysty. Júrgizýshi ómir boıy osy nómirmen júrgisi keletinin, sondyqtan bir-aq ret tańdaý jasaǵanyn málimdedi.
Jyl basynan beri Oral qalasy mamandandyrylǵan HQO bóliminen klıentter jalpy somasy 87 850 604 teńgege «myqty» nómir alǵan. Sondaı-aq, «joǵary suranysqa ıe» nómirler qataryndaǵy sandar nemese áripterdi qoldana otyryp, óz qalaýyndaǵy nómirge ákimshilik polıtsııa basqarmasyna jolyǵý arqyly tapsyrys berýge bolady. Kerekti nómir bos bolsa, bir aıdyń ishinde mamandandyrylǵan bólimnen kelip alady. Kólikti satqan jaǵdaıda klıenttiń VIP-nomerdi óz atyna qaldyrý quqyǵy bar. Tek mamandandyrylǵan bólimge ýaqytsha tapsyrý kerek. Saqtaý merzimi – 6 aı, alǵashqy aıda tegin saqtalady, qalǵan 5 aıy úshin bir ret 8 168 teńge tólenedi.
«Egov portalynda kóliktiń tehpasporty men memlekettik nómirlerdi úıge jetkizý qyzmeti bar. Avtokólikti onlaın túrde qaıta tirkegen soń mamandandyrylǵan bólimge baryp qajet emes, mamandar qujattardy bir kúnniń ishinde jetkizip beredi», dedi A.Nurǵalıeva.
