Batys Qazaqstanda alty kúnde 3 myńǵa jýyq talapker UBT synaǵynan ótti
BQO bilim basqarmasynyń baspasóz qyzmetinen túsken málimetke qaraǵanda, búgin úmitkerler Oralda M.Ótemisov atyndaǵy Batys Qazaqstan memlekettik ýnıversıteti men Jáńgir han atyndaǵy Batys Qazaqstan agrarlyq-tehnıkalyq ýnıversıtetindegi testileý pýnktterine keldi.
BQO bas memlekettik sanıtar dárigeriniń qosymsha shekteý sharalaryn engizý týraly qaýlysyna sáıkes 27, 28 maýsym kúnderi Oralda qoǵamdyq kólikter júrmeıtindikten, talapkerler úshin tasymal uıymdastyryldy.
Bul joly oblystyq mektepter, Oral qalasy jáne Terekti aýdandarynyń túlekteri synaq tapsyrdy. Altynshy lekke qatysýy tıis 443 túlektiń 21-i óz erikterimen test tapsyrýǵa kelmedi. Qalǵan 424 túlek sanıtarlyq talaptardy saqtaı otyryp, tapsyryp shyqty.
Bir atap ótetin jaıt, búgin UBT talaptaryn buzǵany úshin test tapsyrýǵa jiberilmegen nemese aýdıtorııadan shyǵarylǵan túlekter bolǵan joq.
Osylaısha, BQO-da 5 myńnan astam talapker UBT-ǵa qatysýǵa ótinish bildirse, alty kúnde sonyń 2900-i synaqtan ótti.
Eske sala keteıik, budan buryn Oralda bir kúnde 400-den astam talapkerdiń UBT tapsyrǵanyn jazǵan bolatynbyz.
