Batys Qazaqstanda aǵashqa soǵylǵan júk kóligi janyp ketti

Batys Qazaqstan oblysynda aǵashqa soǵylǵan júk kóligi janyp ketti, dep habarlaıdy QazAqparat tilshisi.

BQO TJ departamentiniń baspasóz qyzmetinen málim etkendeı, oqıǵa 14 qyrkúıek kúni Báıterek aýdany Mıchýrın aýylynda bolǵan.

«Saǵat 16.31-de Lenın kóshesi 2-mekenjaı tusynda 32 jastaǵy júrgizýshi aıdap kele jatqan Volvo avtokóligi aǵashpen túıisip, sosyn otqa oranǵan. Júk kóligine kıim-keshek tıelgen. Tilsiz jaý saǵat 18.18-de oqshaýlanyp, 21.43-te tolyqtaı aýyzdyqtaldy. Zardap shekkender joq. Oqıǵa ornyna departament qurylymdarynan 19 adam 4 tehnıkamen bardy. Qazirgi kezde oqıǵanyń jaı-japsary anyqtalý ústinde», - dep habarlady vedomstvodan.

Eske sala keteıik, budan buryn Oralda saıajaı aýmaǵynda qurǵaq shóp pen butalar órtengenin jazǵan bolatynbyz.