Batys Qazaqstanda 57 myńnan astam oqýshy qashyqtan bilim alýda
BQO bilim basqarmasynyń basshysy Aıgúl Myńbaevanyń óńirlik kommýnıkatsııalar qyzmeti alańynda ótken brıfıngide málim etkenindeı, óńirdiń bas memlekettik sanıtar dárigeriniń 14 qańtardaǵy qaýlysyna bilim mekemelerinde bilim berý protsesin uıymdastyrý boıynsha tıisti is-sharalar alyndy.
Onyń aıtýynsha, mektepke deıingi 521 uıymnyń barlyǵy (32 179 bala) shtattyq rejımde jumys jasaıdy.
Mektepterde úshinshi toqsan 17 qańtarda bastalyp, 18 naýryzǵa deıin jalǵasady.
Oblys jáne aýdan ortalyqtarynda oqýshy sany 600-ge deıin 297 mektep bolsa, onda 40 912 shákirt shtattyq rejımde bilim alady. Sondaı-aq oqýshy sany 600-den asatyn 10 aýyl mektebinde 7826 jetkinshek te solaı oqytylady.
Shtattyq sıpatta bilim alatyndar úshin tamaqtandyrý uıymdastyrylady.
Basqarma basshysynyń sózine qaraǵanda, qalalyq jerdegi oqýshy sany 600-ge jetpeıtin 28 mektep (7 984 shákirt) shtattyq rejımde jumys jasaıdy.
Qalalyq jerde oqýshy sany 600-den asatyn 44 mektepte 57 167 shákirt qashyqtan oqytylýda.
Qaýlyǵa sáıkes 1-2 synyptardaǵy 13 483 oqýshyǵa oqytý shtattyq sıpatta júrgiziledi.
Qashyqtan bilim beretin mektepterde 3-5 synyptarda 20 060 oqýshy bar. Olarǵa kezekshi synyptar uıymdastyryldy, sonyń ishinde 18 196-sy shtattyq, 1 864-i qashyqtan oqytylady. Bul jerde ata-ananyń ótinishi negizinde qashyqtan bilim beriledi.
Bilim berý uıymdary qashyqtan oqıtyndarǵa kompıýterlik tehnıkany taratýda. Oqytý onlaın platformasymen uıymdastyrylady.
Tehnıkalyq jáne kásiptik bilim berý júıesinde 2021-2022 oqý jylynda 34 kolledj (17 391 stýdent) jumys isteıdi. Demalys stýdentterge 24 qańtarǵa deıin uzartyldy.
Kolledjder stýdentterin oqytý aralas sıpatta júrgiziledi: barlyq dárister onlaın, ıkemdi keste boıynsha, tájirıbelik, zerthanalyq, semınarlyq sabaqtar shtattyq rejımde.
Sonymen qatar tolyq vaktsınatsııa kýrsynan ótken oqýshylar men stýdentterdi oqý orny ákimshiliginiń qalaýy boıynsha shtattyq rejımde oqytýǵa jol beriledi.
Oblys boıynsha barlyǵy 2 732 oqýshy vaktsına alǵan.
«Óńirde 50 qosymsha bilim berý ortalyǵy qyzmet atqarady. Olarda oqýshylardyń 54,2 paıyzy qamtylǵan. Oqytý – jeke sabaqtar shtattyq rejımde, toptyq sabaqtar – 10 adamǵa deıin oflaın bolady. Mektepterdegi qosymsha sabaqtar qashyqtan uıymdastyrylady. 3 oblystyq arnaýly bilim berý uıymynda jáne 13 túzetý ortalyǵynda oqý shtattyq sıpatta júrgiziledi. Barlyq bilim berý uıymdarynda mindetti túrde sanıtarlyq talaptardy saqtaý sharalary qolǵa alynady», dedi A.Myńbaeva.
Eske sala keteıik, budan buryn BQO-da qaı mektepterdiń onlaın oqytýǵa kóshetinin, óńirde ınfektsııalyq statsıonarda jatqandar sany 150-den asqanyn jazǵan bolatynbyz.