Batys Qazaqstanda 12 synyp karantınge jabyldy
BQO sanıtarlyq-epıdemıologııalyq baqylaý departamenti málim etkenindeı, sondaı-aq osy merzimde 23 muǵalimniń indet juqtyrǵany tirkeldi.
Oblys boıynsha 10 mektepte 12 synyp oqýshylary men muǵalimderin úı karantınine kóshirý týraly 10 qaýly shyǵaryldy.
Oǵan qosa osy aıda orta arnaýly oqý oryndarynda 3, JOO-da 8 stýdenttiń aýyrǵany belgili boldy.
Kún saıyn pedagogtar men oqýshylar, stýdentter men qyzmetkerler arasynda monıtorıng júrgizilýde.
Departament málimetine qaraǵanda, 1 qazannan beri óńirde 701 naýqas tirkeldi.
Sonyń ishinde 59 paıyzy (406) JRVI belgilerimen tekserilse, 26 paıyzy (186) buryn aýyrǵandarmen qarym-qatynasta bolǵan. 14 paıyzynan (102) profılaktıkalyq maqsatta, 1 paıyzynan (7) statsıonarǵa jatqyzar aldynda synama alynǵan.
Jas erekshelikteri boıynsha 116-sy – 14 jasqa deıingiler, 45-i – 15-17, 34-i – 18-25, 146-sy – 26-40, 192-si – 41-60 jas aralyǵyndaǵylar, 168-i – alpystan asqandar. KVI 41-60 jastaǵylar arasynda kóbirek ushyrasyp otyr.
Jyl basynan beri Batys Qazaqstanda 28 952 adamnan koronavırýs tabyldy, bul 100 myń turǵynǵa shaqqanda, 4383,1-den keledi.
Sońǵy aptada (7-13 qazan – 363) aldyńǵymen (30 qyrkúıek – 6 qazan – 395) salystyrǵanda, indet juqtyrý kórsetkishi 8,1 paıyzǵa tómendedi.
Eske sala keteıik, budan buryn BQO-da sozylmaly syrqaty barlardyń vaktsınatsııaǵa jıi kele bastaǵanyn jazǵan bolatynbyz.
