Batys Qazaqstan oblysynyń úzdik taýar óndirýshileri marapattaldy

ORAL. QazAqparat - Oral qalasynda «Qazaqstannyń úzdik taýary - 2017» oblystyq kórme-baıqaýy márege jetip, jeńimpaz-júldegerler anyqtaldy, dep habarlaıdy «QazAqparat» tilshisi.

Sharaǵa qatysqan oblys ákiminiń orynbasary Igor Steksovtiń aıtýynsha, atalmysh baıqaý Elbasy tapsyrmasyna sáıkes 2006 jyldan beri uıymdastyrylyp, elimiz boıynsha úzdik atanǵandarǵa «Altyn sapa» syılyǵy tapsyrylyp keledi. Mundaı marapatqa ıe bolǵandar qatarynda batysqazaqstandyq «Kýbleı», «Agroprodýkt LTD» kompanııalary bar. Sol sekildi «Gıdromash - Orıon MJBK», «Jelaev nan ónimderi kombınaty», «Steklo-Servıs» JShS taýarlary da respýblıkalyq deńgeıde joǵary baǵalandy.

Bul joly qyryqqa jýyq kásiporyndardyń ónimderi kórmege qoıylyp, óndiristik, halyq tutynatyn, azyq-túlik taýarlary sarapqa salyndy.

Baıqaý qorytyndysynda «Oral saýda-ónerkásip kompanııasy JShS (dırektory Valerıı Krylov) «Óndiristik maqsattaǵy úzdik taýarlar» atalymy boıynsha úzdik shyqsa, «Oral transformator zaýyty» JShS ekinshi, «Azot zaýyty» JShS úshinshi orynǵa ıe boldy. «Halyq tutynatyn úzdik taýarlar» atalymy boıynsha «Kondensat» AQ (basshysy Valerıı Júnisov), «Marııa hanym» sán úıi - «Juldyz» JK, KazStepService» JShS júldeli oryndardy bólisti. «Úzdik azyq-túlik taýarlary» atalymynan «Nurjanar» JShS (basshysy Rýstam Ahmetov) ozsa, «Rodnık» JShS, «Oral qus fabrıkasy» JShS sáıkesinshe ekinshi, úshinshi oryndarǵa kóterildi. Jeńimpaz-júldeger kompanııalarǵa dıplomdar men «Qazaqstannyń úzdik taýary» eskertkish belgisi tapsyryldy.

Jeńimpazdar Astanada EKSPO-2017 halyqaralyq kórmesi aıasynda ótetin respýblıkalyq baıqaýǵa qatysady.