Batys Qazaqstan oblysynda «Jaıyq barysy» anyqtaldy

ORAL. QazAqparat – Syrym aýdanynda «Qazaqstan barysy» respýblıkalyq týrnırine oblystyq irikteý saıysy ótip, Temirlan Kólbaı «Jaıyq barysy» atandy, dep habarlaıdy QazAqparat tilshisi.

Týrnırge ár aýdannan jáne Oral qalasynan eń úzdik balýandar qatysyp, baq synady.

Jarystyń ashylý saltanatynda Syrym aýdanynyń ákimi Tólegen Tóreǵalıev, BQO Dene shynyqtyrý jáne sport basqarmasynyń basshysy Qaımen Esendııarov, óńirge tanymal bapker Sanat Bersebaev balýandarǵa sáttilik tiledi.

Úshinshi oryn úshin beldesýde syrymdyq Mereı Berdiǵalı men oraldyq Nurymjan Ǵabbasov kilemge shyqty. Negizgi ýaqytta bir-birimen teń túsken eki balýan jeńimpazdy qoıan-qoltyq beldesýde anyqtap, onda Nurymjan ábjildik tanytty.

«Qazaqstan barysyna» budan buryn da qatysyp júrgen bórlilik Temirlan Kólbaı men jańaqalalyq Erasyl Ahmetov altyn beldikti sarapqa saldy. Onda eki jartylaı jeńispen beldesýdi óz paıdasyna sheshken Temirlan byltyrǵy chempıondyq ataǵyn bıyl da qorǵap qaldy.

Astana kúnine oraı elordada ótetin respýblıkalyq týrnırde Temirlan Kólbaı men Erasyl Ahmetov BQO namysyn qorǵaıdy.

Marapattaý rásiminen keıin syrymdyqtar, naqtyraq aıtqanda, Jympıtynyń 1985 jyly týǵan azamattary jarys jeńimpazy Temirlan Kólbaıǵa at mingizdi.

Demeýshi - Arman Ahmetqalıev.

Jalpy, «Jaıyq barysynyń» Syrym aýdanynda ótýi kezdeısoq emes. Óıtkeni bul aýdannan talaı ataqty sportshylar shyqqan.

Solardyń ishinde 1989 jyly sambodan álem chempıony atanǵan Asqar Shaıhıevti erekshe aıtýǵa bolady.

Sol sekildi buldyrtylyq Nurlan Bekjanov erkin kúresten qazaq jastary arasynda alǵash ret álem chempıonatynyń kúmis medalin jeńip aldy.

Eske sala keteıik, budan buryn BQO-da Sadyq Jaqsyǵulovty eske alýǵa arnalǵan týrnır máresine jetkenin jazǵan edik.

Sondaı-aq BQO-da jartylaı marafon jeńimpazdary anyqtaldy.