Batys Qazaqstan oblysynda 4300-den astam túlek UBT tapsyrmaqshy
BQO bilim basqarmasynyń baspasóz qyzmeti málim etkenindeı, UBT óńirde 22 maýsymda bastalady.
Testileý Aqjaıyq, Bórli, Jańaqala, Jánibek, Qaztalov, Qaratóbe, Syrym aýdandarynda jáne Oralda M.Ótemisov atyndaǵy Batys Qazaqstan memlekettik ýnıversıteti men Jáńgir han atyndaǵy Batys Qazaqstan agrarlyq-tehnıkalyq ýnıversıtetinde ótedi.
Alǵashqy bolyp synaqty jańaqalalyq jáne jánibektik túlekter bastaıdy.
M.Ótemisov atyndaǵy BQMÝ janyndaǵy UBT fılıalynyń sarapshysy Shyńǵys Aqshıevtiń aıtýynsha, atalǵan oqý ornynda túlekter 26 maýsym jáne 3 shilde aralyǵynda 8 lek bolyp tapsyrady. Synaqtan qala jáne Báıterek aýdanynyń, sondaı-aq byltyrǵy jáne bıylǵy kolledj túlekteri (barlyǵy 2066) ótedi.
«UBT kezinde sanıtarlyq-epıdemıologııalyq talaptar qatań saqtalýy kerek. UBT 5 pán (3 mindetti jáne 2 beıindi) boıynsha qaǵaz júzinde ótkiziledi. Test tapsyrmalarynyń sany – 120. Eń joǵary ball – 140. Degenmen jańalyq-ózgerister de joq emes», dedi QazAqparat tilshisine Shyńǵys Aqshıev.
Atap aıtqanda, jańalyqtar mynadaı:
-tulǵanyń bet-álpetin taný kómegimen (Face ID) sáıkestendirý;
-elektrondy sertıfıkat jáne bilim berý grantyn taǵaıyndaý týraly elektrondyq kýálik;
-SAT, ACT jáne IB halyqaralyq standarttalǵan testeriniń baldaryn UBT balyna aýdarý;
-shektik ball jınamaǵan tulǵalarǵa UBT-ny qaıtadan tapsyrý múmkindigi beriledi;
-bolashaq pedagogtar úshin shektik ball – 70;
-UBT barysynda túsirilgen beınejazba saraptalady. Test tapsyrýshylardyń tyıym salynǵan quraldardy paıdalanǵany anyqtalǵan jaǵdaıda UBT nátıjesi de, taǵaıyndalǵan bilim berý granty da kúshin joıady;
-UBT tapsyrý oryndarynda kalkýlıator beriledi;
-testileý ýaqyty – 4 saǵat.
-Túlekterdiń bárine sáttilik tileımiz, - dedi Sh.Aqshıev.
Eske sala keteıik, budan buryn Batys Qazaqstanda 100 myńnan astam shákirttiń oqý jylyn aıaqtaǵanyn, balany urǵan mektep dırektoryna qatysty sot úkimi shyqqanyn jazǵan bolatynbyz.
