Batys Qazaqstan oblysynda 416 eldi mekenniń 305-i ınternetke qosylǵan
BQO Tsıfrlyq tehnologııalar basqarmasynyń basshysy Nurlan Nursultannyń Óńirlik kommýnıkatsııalar qyzmeti alańynda ótken brıfıngide málim etkenindeı, 8 myń adam turatyn 83 aýyl baılanys jáne ınternetpen qamtylmaǵan.
Onyń sózine qaraǵanda, sonyń ishinde turǵyn sany 250-den aspaıtyn 37 eldi mekende arnaıy joba arqyly baılanyspen qamtý jumystary júrgizilýde. Al qalǵan aýyldarǵa mınıstrlik jáne baılanys operatorlarymen birlesip jol kartasy ázirlenýde.
Kúni búgin «Qazaqtelekom» AQ eldi mekenderdi optıkalyq tehnologııaǵa qosý boıynsha «Aýyldaǵy tsıfrlyq seriktes» jobasyn iske asyrýdy josparlaýda. Atap aıtqanda, oblys boıynsha 4 seriktes tehnıkalyq sharttardy alyp, 12 aýyldy ınternetpen qamtýdy kózdep otyr. Qazirgi tańda Tasqala aýdanynda Mereke, Terektide Jańaómir aýyly keń jolaqty ınternetpen qamtyldy.
Sonymen qatar «Qazaqtelekom» AQ zańdy tulǵalar úshin optıkalyq baılanys jelilerin salý jáne 5346 klıentke 194 kópqabatty sektorda FTTH optıkalyq jelisin keńeıtý jumystaryn júrgizdi.
«Trastelekom» AQ jáne onyń dılerleri Oral qalasynyń soltústik-shyǵys bóligin, áleýmettik nysandar, jeke jáne kópqabatty úılerdi ǵalamtorǵa qosty.
Basqarma basshysy uıaly baılanys operatorlarynyń da osyndaı jumys júrgizip jatqanyn baıan etti. Mysaly, bıyl «KaR-Tel» JShS (Beeline) 37 aýylda jáne Oral qalasynda óz qyzmetterin atqarmaqshy. 26 aýylda qoldanystaǵy bazalyq stantsııalar jańartylsa, 11 eldi meken men Oralda jańadan ornatylmaqshy. Sol sekildi «Kcell» AQ 43 aýyldy baılanys jáne mobıldi ınternetpen qamtý, onyń sapasyn jaqsartý jumystaryn júrgizýde. Sonyń ishinde 3 aýylǵa jańa bazalyq stantsııa ornatylsa, 9-ynda 4G standartyna jańartyldy. Qalǵan 31 aýyl jyl sońyna deıin qamtylmaq.
N.Nursultan Oral qalasynyń keıbir bóliginde (M.Móńkeuly kóshesi, N.Nazarbaev dańǵyly jáne t.b.) baılanys sapasy tómen ekendigin jetkizdi. Munyń sebebi halyq tyǵyz ornalasqan aýmaqta bazalyq stantsııalardyń syıymdylyǵy kótermeýi múmkin. Bul jaǵdaıda operatorlar jańa bazalyq stantsııalardy salýy kerek. Alaıda keıbir turǵyndardyń densaýlyqqa áser etedi degen jeleýmen kópqabatty úılerdiń tóbesine baılanys operatorlaryna bazalyq stantsııasyn ornatýǵa ruqsat bermeýi buǵan kedergi keltirýde.
«Internet pen baılanys quraldarynyń barlyq salada keńinen taralyp, kúndelikti qyzmettiń kóbi smartfon men basqa da qurylǵylarǵa baılanysty ekendigin eskere otyryp, bul jaǵdaıǵa birtindep beıimdelýimiz kerek.
Eń bastysy, baılanys operatorlary bazalyq stantsııalardy (antennalar) ornatý kezinde sanıtarlyq-epıdemıologııalyq baqylaý departamentinen qajetti qujattardy rásimdep, halyqaralyq standarttarǵa sáıkes adam densaýlyǵyna qaýipsiz degen qorytyndy alady.
Taǵy bir másele – aýyldar men qalada sertıfıkattalmaǵan repıtor qurylǵysynyń (uıaly baılanys jelisin kúsheıtkish) ornatylýy bazalyq stantsııalarǵa keletin sıgnaldardyń sapasyn nasharlatady. Sonyń saldarynan aýyl turǵyndary sapaly qyzmet ala almaıdy.
Máselen, bir úıde uıaly baılanys jelisin kúsheıtkish qurylǵysy ornatylsa, onyń kórshisi baılanys nemese mobıldi ınternetti durys paıdalana almaıdy. Qoryta aıtqanda, baılanys pen ınternet sapasyn arttyrý, onyń taralý aýmaǵyn keńeıtý maqsatynda oblys basshylyǵy men Qazaqstan Respýblıkasy Tsıfrlyq damý, ınnovatsııalar jáne aeroǵarysh ónerkásibi mınıstrligi arasynda arnaıy jol kartasy ázirlenýde. Sonymen qatar Úkimet deńgeıinde «Qoljetimdi ınternet» Ulttyq jobasy júzege asyrylýda», - dedi Nurlan Nursultan.
