Batýmıde daýyl soǵyp, bir adam mert boldy

BATÝMI. QazAqparat – Grýzııanyń Batýmı qalasynda kesheden beri kúshti daýyl soǵyp, úılerdiń shatyryn ushyryp áketip jatyr, dep habarlaıdy QazAqparat Newsreadonline-ǵa silteme jasap.

Surapyl daýyl qalany ǵana emes, Qara teńiz tolqyndaryn da shaıqap jatyr. Onda 5 baldyq daýyl tirkeldi.

Jergilikti turǵyndar tabıǵattyń mundaı qubylysy kóp jyldan beri bolmaǵanyn aıtady. Aýada shatyrdyń synyqtary, torlar, turmystyq zattar, tipti ıtter de ushyp júr. Daýyl qalanyń ınfraqurylymyn búldirdi, aǵashtardy qoparyp, shatyr men jarnama bannerlerin ushyrǵan.

Jergilikti bılik Frıdon Halvashı dańǵylyndaǵy qozǵalysty shekteýge májbúr boldy. Onda jel kópjyldyq evkalıpterdi julyp áketken.

Kúshti jel saldarynan Batýmı mańyndaǵy Kobýletı qalasynyń Agmashenebelı kóshesinde avtokólikke aǵash qulap, ishinde bolǵan jas adam qaza tapqan. Aqparatty Batýmı ІІM-i rastady. Mekeme málimeti boıynsha, tergeý bastalǵan. Kúshti jel saldarynan zardap shekken basqa turǵyndar týraly aqparat bolmady.

Jedel qyzmetke qıraǵan ǵımarattar týraly aqparat túsýi tolastamady. Tótenshe jaǵdaılardy basqarý qyzmeti barlyq qońyraý boıynsha jedel áreket etýge tyrysyp jatyr.

Eprimefeed dereginshe, Batýmıdegi «Adjarabet Arena» stadıonynda Evro-2024 irikteý týrnıriniń Grýzııa men Norvegııa quramalary arasyndaǵy matchyn tamashalaǵan myńdaǵan jankúıer aman. Kúshti jel stadıon mańyndaǵy turaqtyń qorshaýlaryn julyp, avtokólikterdi zaqymdaǵan, dep habarlaıdy Sputnik-Grýzııa. Sınoptıkterdiń boljaýynsha, Grýzııanyń batysynda osy kún raıy áli birneshe kúnge sozylady.