Batys Qazaqstanda taǵy bir ushqyshsyz ushatyn apparattyń bólshekteri tabyldy

ORAL. KAZINFORM — Batys Qazaqstan oblysy Kaztalov aýdany aýmaǵyna ushqyshsyz ushatyn apparat qulaǵany týraly aqparat tarady.

BQO polıtsııa departamentiniń baspasóz qyzmetinen málim etkenindeı, ushqyshsyz ushatyn apparattyń bólshekterine uqsas zattyń tabylýyna baılanysty ýákiletti qyzmettermen birlesip tekserý is-sharalary júrgizilip jatyr. 

— Nysan eldi mekennen alys aýmaqtan tabylǵan. Qazirgi kezde oqıǵanyń barlyq mán-jaıy anyqtalý ústinde, — dep habarlady vedomstvodan.

Turǵyndardyń sózine qaraǵanda, oqıǵa 27 naýryz kúni keshkisin Kókterek aýyldyq okrýgi aýmaǵynda boldy. Ushqyshsyz ushatyn apparat bólshekteri Saraljyn (Kırov) eldi mekeninen 10 shaqyrymdaı qashyqtyqta túsken.

Budan buryn osyndaı oqıǵalar Bókeı ordasy aýdany Uıaly, Tasqala aýdany Atameken jáne Jánibek aýdany Uzynkól, Qamysty aýyldary mańynda bolǵan edi.

Eske sala keteıik, budan buryn BQO-da taǵy da ushqyshsyz ushatyn apparattyń bólshekteri tabylǵanyn jazǵan edik.