Batys Qazaqstanda jasóspirimder jasaǵan qylmys sany kóbeıgen
Batys Qazaqstan oblysynda jasóspirimder jasaǵan qylmys sany 60,7 paıyzǵa ósip otyr. Bul týraly BQO polıtsııa departamentinde ótkizilgen konsýltatıvtik-keńesshi organnyń otyrysynda aıtyldy, dep habarlaıdy QazAqparat tilshisi.
BQO PD jergilikti polıtsııa basqarmasynyń bastyǵy, polıtsııa podpolkovnıgi Ernar Sultanǵalıevtiń aıtýynsha, bıylǵy toǵyz aıda 69 jasóspirim 82 qylmys jasaǵan, bul ótken jylǵy osy kezeńdegiden (51) edáýir artyq.
Onyń sózine qaraǵanda, jasóspirimder qylmysynyń aldyn alý baǵytynda oblys aýmaǵynda 11 jedel aldyn alý is-sharasy («Qolaısyz otbasy», «Túngi qaladaǵy balalar», «Jasóspirim», «Jasóspirim-zań-qaýipsizdik» jáne basqa) ótkizildi.
«Atalǵan is-shara barysynda QR Ákimshilik quqyqbuzýshylyq týraly kodeksiniń 442-babyna (kámeletke tolmaǵandardyń zańdy ókilderiniń erip júrýinsiz túngi ýaqytta oıyn-saýyq mekemelerinde nemese turǵynjaıdan tys jerde bolýy) sáıkes kámeletke tolmaǵandardyń 2 852 zańdy ókili jaýapkershilikke tartyldy. Oral qalasynda 64 mektep pen 20 kolledjde «Komek Stop Bullying» jobasy bıylǵy mamyr aıynan bastap iske qosyldy. Onda oqýshylar QR arqyly ózderiniń problemalaryn, emotsııalary men qorqynyshtaryn erkin jáne jasyryn túrde bildire alady. «Komek Stop Bullying» jobasy boıynsha ótinish bildirilgen oqý oryndarynda biz bopsalaý derekterin anyqtap, zań aıasynda jumys isteımiz», - dep atap ótti E.Sultanǵalıev.
Osy oraıda BQO konsýltatıvtik-keńesshi organy tóraǵasynyń orynbasary Tuıaqbaı Rysbekov pikir bildirdi.
«Búginde balalardy jete bilý, olardyń ishki dúnıesin túsiný óte mańyzdy máselege aınalyp otyr. Otan otbasynan bastalady desek, otbasyndaǵy bala tárbıesine birinshi ata-ana jaýapty bolýy kerek. Kámeletke tolmaǵandar arasyndaǵy quqyq buzýshylyqty boldyrmaý maqsatynda bilim ordalarymen birige otyryp jumys atqarýymyz qajet. Eń bastysy, qoǵam bolyp bala tárbıesimen aınalysýymyz qajet», - dedi ol.
«Atalǵan «Komek Stop Bullying» jobasy tek oqý oryndarynda ǵana emes, sondaı-aq balalar kóp jınalatyn oryndarda, ıaǵnı oıyn-saýyq ortalyqtary, saýda úıleri men klýbtarda kóbirek ornatylsa, qylmystyń aldyn alýǵa múmkindik týar edi» - degen usynys bildirdi KKO múshesi, BQO máslıhatynyń depýtaty Shattyq Ótebalıeva.
Keńeske qatysýshylar beınebaqylaý kameralarynyń kómegimen qaýipsizdik sharalaryn qolǵa alýǵa bolatynyn alǵa tartty. Mundaı kameralardyń, ásirese buzaqylyq, qorqytyp-úrkitý, aqsha bopsalaý derekteri bolatyn oryndarda, tipti ájethanalardyń mańyna da ornatylǵany durys.
Jıynda sondaı-aq, jol-kólik oqıǵalary men mal urlyǵy máselesi de talqylandy. BQO polıtsııa departamentiniń bastyǵy, polıtsııa polkovnıgi Arman Orazalıev qabyldanǵan sheshimderdiń oryndalýy baqylaýda bolatynyn atap kórsetti. Ol konsýltatıvtik-keńesshi organnyń múshelerine túıtkildi jaıttardy sheshýge qosqan úlesi úshin alǵys bildirdi.
Eske sala keteıik, budan buryn BQO-da jasóspirimderdiń kishkentaı eki balaǵa kúshtep temeki shektirgenin jazǵan bolatynbyz.
