Batys Qazaqstanda sýǵa ketken úıler sany 500-den asty
ORAL. KAZINFORM — Batys Qazaqstan oblysynda sý tasqynyna baılanysty apattyq-qutqarý jumystary jalǵasýda.
BQO TJ departamentiniń baspasóz qyzmetinen málim etkenindeı, osy kezge deıin 4 525 adam evakýatsııalansa, sonyń 1 771-i – balalar.
Qaýipsiz oryndarǵa 1 425 iri qara, 2 004 usaq mal jáne 33 bas jylqy aıdaldy.
Qarǵyn sý basý bastalǵannan beri 764 myń tekshe metr sý sorylyp, 161 myńnan astam qap tóseldi.
«Qazirgi kezde oblys boıynsha 1 myńnan astam adam (300-den astam tehnıka, 100-den astam motopompa) kúsheıtilgen rejımde jumys jasaýda. Shyńǵyrlaý, Jaqsybaı, Óleńti, Buldyrty ózenderiniń arnasynan asýy jáne qar sýynyń qosylýy saldarynan 4 aýdannyń 10 aýylynda (Terekti aýdany – Ańqaty, Podstepnyı, Syrym – Jympıty, Óleńti, Buldyrty, Qaratóbe – Qorjyn, Bórli – Aqsý, Keńtúbek, Araltal, Pýgachev eldi mekenderi) 515 turǵyn úı sý astynda qaldy. Sýǵa ketken úıler sany naqtylaný ústinde. Bórli aýdany Besaǵash aýyly tusynda 2 sáýir kúni saǵat 07.00-de bógettiń ústimen eki jerden sý ótkeni (tereńdigi – 10-15 sm, uzyndyǵy – 50 m, eni – 6 m) anyqtaldy. Sondaı-aq sý shlıýz jáne tabıǵı aınalma jol arqyly ótýde. Oblys avtojoldarynda 25 sý ótý jáne 32 sý shaıý deregi tirkelgen. Óńirde jaǵdaı áli de kúrdeli. Sý basý qaýpi tóngen jaǵdaıda evakýatsııalyq sharalar júrgiziledi», - dep habarlady vedomstvodan.
Turǵyndardyń sózine qaraǵanda, Oral qalasynda ózen jaıylmalarynda ornalasqan saıajaı úıleri sýǵa ketip jatyr.
Eske sala keteıik, budan buryn sý tasqynyna baılanysty BQO-da respýblıkalyq jol opyrylyp ketkenin jazǵan bolatynbyz.
«QazAvtoJol» UK» AQ BQO fılıaly bul jolda jóndeý jumystary júrgizilip, qalpyna keltirilgenin jetkizdi.
