Batys Qazaqstanda sýǵa batyp ketkender sany 20-ǵa jetti

ORAL. KAZINFORM — Batys Qazaqstan oblysynda jyl basynan beri sý aıdyndarynda 20 adamnyń batyp ketý deregi tirkeldi. 

BQO TJD tótenshe jaǵdaılardy joıý basqarmasynyń bastyǵy Baqytjan Ihsanovtyń óńirlik kommýnıkatsııalar qyzmeti alańynda ótken brıfıngte málim etkenindeı, sonyń ishinde úsheýi (Oral qalasy — 1, Báıterek aýdany — 2) — kámeletke tolmaǵandar.

Baqytjan Maǵzomulynyń sózine qaraǵanda, 10 oqıǵa (úsheýi — bala) shomylý kezinde boldy.

— Bıyl sýǵa ketkender sany edáýir kóbeıip otyr. Aıtalyq, ótken jyly osy sebepten barlyǵy 16 adam kóz jumsa, sonyń altaýy — balalar. Sonyń ishinde 14 oqıǵa (4 bala) shomylý maýsymy kezinde bolǵan. Jyl basynan beri sý aıdyndaryndaǵy qaýipsizdik qaǵıdalaryn buzǵany úshin Ákimshilik quqyq buzý týraly kodeksiniń 412-babyna sáıkes 54 adam jáne 3 zańdy tulǵa jaýapkershilikke tartylyp, olarǵa 814 myń 374 teńge aıyppul salyndy, — dedi Baqytjan Ihsanov.

Batys Qazaqstan oblysynda sońǵy kúnderi kún qatty ysyp tur. Aıtalyq, 10 shildede kúnniń 35-38 gradýsqa deıin ysyp, órt qaýpi kúsheıetini týraly eskertý jarııalandy.

Turǵyndardyń sózine qaraǵanda, 9 shilde kúni Báıterek aýdany Baıqonys aýylynda qaıǵyly oqıǵa boldy. 6-synypty bitirgen bala sýǵa ketip qaldy.

Eske sala keteıik, budan buryn BQO-da órt qaýipsizdigi talaptaryn buzǵan 600-ge jýyq adamǵa aıyppul salynǵanyn jazǵan edik.