Batys Qazaqstanda sý tasqynynan egis dalasy da zııan shekti

ORAL. KAZINFORM – Batys Qazaqstan oblysynda aýdan ákimdikteri usynǵan málimetterge sáıkes 266 myń gektarǵa (60 paıyz) ylǵal jabyldy.

BQO aýyl sharýashylyǵy basqarmasy basshysynyń orynbasary Berik Sıtqazıevtiń óńirlik kommýnıkatsııalar qyzmeti alańynda ótken brıfıngte málim etkenindeı, sondaı-aq 18 myń gektarǵa (7 paıyz) kýltıvatsııa júrgizilip, 2,7 myń gektar (54 paıyz) jer jyrtyldy. 

Berik Maratulynyń sózine qaraǵanda, kúni búginge deıin 8,4 myń gektarǵa dándi daqyldar, 1,5 myń gektarǵa maıly daqyldar jáne 1,8 myń gektarǵa mal azyqtyq daqyldar egilse, 70 gektarǵa kartop, 55 gektarǵa kókónis otyrǵyzyldy. Egis egý jumystary jalǵasýda.

Onyń aıtýynsha, bıylǵy sý tasqyny saldarynan oblys ortalyǵy men birqatar aýdanda aýyl sharýashylyǵy nysandaryna zaqym keldi. Onyń ishinde ósimdik sharýashylyǵy nysandary da bar. 

«Qardyń tez erýi jáne túsken jaýynnyń saldarynan kúzdik egistikterge, shaǵyn sharýashylyq qoımalaryndaǵy tyńaıtqyshtarǵa, jylyjaılarǵa zaqym kelgen. Bul nysandar Báıterek, Terekti, Bórli aýdandary men Oral qalasynda ornalasqan. Sý tasqynynan zardap shekkenderdiń barlyǵyna qoldaý kórsetý maqsatynda memleket barlyq qajetti sharalardy, sonyń ishinde keltirilgen zalaldy ótemaqy túrinde óteýdi qolǵa alýda. Osy maqsatta jeke jáne zańdy tulǵalarǵa kelgen zııandy óteý qaǵıdasy ázirlendi, qazirgi ýaqytta barlyq múddeli organdarmen, sonyń ishinde kásipkerler palatasymen jáne basqa da bıznes qurylymdarmen kelisilýde. Aýdandarda qurylǵan komıssııa sý tasqyny bolǵan jerlerdi aralap, aktileýde. Qorytyndylary tıisti organdarǵa usynylady» dedi B.Sıtqazıev.

Onyń naqtylaýynsha, komıssııalarǵa 22 ótinish túsken, onyń ishinde Terekti aýdanynda — 3, Bórlide — 1, Báıterek — 16, Oral qalasynda — 2.

Keıbir nysandarda áli de sý bar, sondyqtan olardy baryp qaraý múmkin emes. 

Qaıtken kúnde de memleket tarapynan qoldanystaǵy zańnama aıasynda jan-jaqty qoldaý kórsetiledi. 

Basqarma málimeti boıynsha bıyl barlyq aýyl sharýashylyǵy daqyldarynyń egis alqaby 607 myń gektar bolsa, sonyń 97 myńy — kúzdik daqyldar. 

«Kúzdik egistiń 31 myń gektary nemese 32 paıyzy jaqsy, 61 myńy (63 paıyzy) qanaǵattanarlyq dep baǵalandy. Al nashary — 5 myń ga nemese 5 paıyz. Jazdyq egiske qajet tuqym (28 myń tonna) tolyq daıyndaldy. Tehnıka jetkilikti. Maýsymdyq jumystardy júrgizý úshin dıqandardyń arzandatylǵan dızel otynymen qamtylýy óte mańyzdy. Batys Qazaqstanǵa Atyraý munaı óńdeý zaýytynan egis jumystaryna 8,5 myń tonna arzandatylǵan dızel otyny bólindi. Jetkizýshi operator „Neftek“ seriktestigi, 1 lıtrdiń baǵasy — 238 teńge. Bul -respýblıka boıynsha tómen baǵalardyń biri. Búginde sharýalar 7,1 myń tonna dızel otynyna operatormen kelisimshartqa otyrdy, bul — bólingen kólemniń 84 paıyzy. Degenmen dızel otynynyń búginde tek 1,9 myń tonnasy ǵana alyndy. Bul rette qajet dızel otyny kólemi sharýalardyń ózderi usynǵan ótinimderi boıynsha elektrondy túrde qalyptastyrylǵanyn aıta ketkim keledi» dedi B.Sıtqazıev.

Eske sala keteıik, budan buryn BQO-da 600 myńnan astam gektar alqapqa aýyl sharýashylyǵy daqyldaryn egiletinin jazǵan bolatynbyz.