Batys Qazaqstanda sý basqan aýmaqtarda epıdemıologııalyq ahýal turaqty

ORAL. KAZINFORM – Batys Qazaqstan oblysynda sý basqan aýmaqtarda epıdemıologııalyq ahýal turaqty.

BQO sanıtarııalyq-epıdemıologııalyq baqylaý departamenti basshysynyń orynbasary Nurlybek Mustaevtyń Kazinform tilshisine málim etkenindeı, sý tasqyny bolǵan Qaratóbe, Syrym, Bórli, Terekti, Báıterek aýdandary jáne Oral qalasynda jiti ishek juqpalary tirkelgen joq.

Nurlybek Ermekulynyń sózine qaraǵanda, jiti ishek juqpalarymen syrqattanýshylyq bıylǵy tórt aıda ótken jylǵy deńgeımen salystyrǵanda birdeı.

Jyl basynan beri toptyq syrqattaný, qutyrý, tyrysqaq, oba, sibir jarasy sııaqty asa qaýipti ınfektsııalar, sondaı-aq dıfterııa, qyzamyq, ish súzegi, polıomıelıt, bezgek, sirespe tirkelgen joq.

«Oblys boıynsha 9 adamnyń jedel A vırýstyq gepatıtine shaldyqqany tirkeldi, bul ótken jylǵydan (12) az. Munyń bári sý tasqynyna baılanysty emes. Aýrýdyń sebepteri – vaktsınatsııa arqyly qalyptasatyn ımmýnıtettiń tómendeýi. Qazirgi tańda josparlanǵan vaktsınadan basqa A vırýstyq gepatıtine qarsy tolyqtyra vaktsınatsııa júrgizilýde. Osy oraıda úılerin sý basqan turǵyndar turyp jatqan ýaqytsha ornalastyrý pýnktteri de nazardan tys qalǵan joq. A vırýstyq gepatıtiniń aldyn alý maqsatynda evakýatsııalyq pýnktterde buryn josparly ekpelerin ótkizip alǵan 14 jasqa deıingi 38 balaǵa vaktsınatsııa jasaldy», dedi N.Mustaev.

Bir aıta ketetin jaıt, óńirde qyzylshaǵa baılanysty epıdemıologııalyq ahýal turaqsyz bolyp qalyp otyr.

«Oblysta jyl basynan beri 853 adamnyń qyzylshamen aýyrǵany tirkeldi. Degenmen naýryzben salystyrǵanda, sáýir aıynda syrqattanýshylyq 33 paıyzǵa tómendedi. Naýqastardyń negizgi bóligi – ekpe jasyndaǵy balalar, ekpe jasyna jetpegen bir jasqa deıingi sábıler, sondaı-aq ekpeden bas tartqan ata-analardyń ul-qyzdary. Qyzylsha oshaqtarynda qarym-qatynasta bolǵan adamdarǵa medıtsınalyq baqylaý ornatylyp, epıdemıologııalyq kórsetkishter boıynsha shuǵyl vaktsınatsııa jasaldy. Qosymsha jappaı ımmýndaý aıasynda qyzylshaǵa qarsy 47 177 bala egildi. Sondaı-aq kókjótelmen aýyrǵan 14 adamnyń basym kópshiligi (10) – 1 jasqa deıingiler, úsheýi – 1-5 jas aralyǵyndaǵy balalar. Aýyrǵandardyń barlyǵy ata-analarynyń bas tartýyna baılanysty ekpemen qamtylmaǵan», dedi N.Mustaev.

Eske sala keteıik, budan buryn BQO-da sý basqan aýmaqtarda synamalar alynyp, dezıfektsııalaý jumystary júrgizilip jatqanyn jazǵan bolatynbyz.