Batys Qazaqstanda ózen jaǵasyndaǵy aǵashtar nelikten otaldy
ORAL. KAZINFORM — Batys Qazaqstan oblysynda Jaıyqtyń salasy – Kóshim ózeni jaǵasyndaǵy aǵashtardyń otalyp tastalǵany jóninde áleýmettik jelide beınejazba jarııalandy.
Turǵyndardyń paıymdaýynsha, bul ekologııalyq apatqa soqtyrady. Shaǵannyń Jaıyqqa quıatyn tusynda da osyndaı jaǵdaı oryn alǵan. Buǵan ekologtar da alańdaýshylyq bildirdi.
Osyǵan oraı Kazinform tilshisi BQO tabıǵı resýrstar jáne tabıǵat paıdalanýdy retteý basqarmasyna arnaıy saýal joldady.
Basqarma málimetine qaraǵanda, aǵashtar otalǵan jerler orman alqaptaryna jatpaıdy. Bul jumystar Shaǵan ózeni tarmaǵy men Jaıyq-Kóshim sýarý-sýlandyrý júıesi magıstraldyq kanalyn mehanıkalandyrylǵan tazartý jobasyna sáıkes júrgizilgen.
Joba maqsaty — mehanıkalandyrylǵan tazartý arqyly Aqjaıyq, Báıterek, Jańaqala, Kaztalov, Tasqala aýdandaryn qosqanda, Batys Qazaqstan oblysynyń úlken aýmaǵyndaǵy aýyl sharýashylyǵy óndirisi úshin sý jetkizýdi jaqsartý. Sý Jaıyq ózeninen Shaǵan tarmaǵy, Kóshim magıstraldyq kanaly, sý qoımalary men arnalary arqyly beriledi.
Joba boıynsha Shaǵan tarmaǵyn (48 km) jáne Kóshim kanalyn (27 km) mehanıkalandyrylǵan tazartý, arnasyn keńeıtý jáne basqa jumystar kózdelgen.
Jobalyq-smetalyq qujattama boıynsha 2022 jyly 4 mamyrda «Gosekspertıza» RMK-dan oń qorytyndy alynǵan.
Qurylystyń jalpy quny — 2 mlrd 592,536 mln teńge. Júzege asyrý merzimi — 2023-2026 jyldar.
Tapsyrys berýshi — QR Sý resýrstary jáne ırrıgatsııa mınıstrliginiń Sý sharýashylyǵy komıteti. Qurylys-montaj jumystaryn 2 mlrd 299,9 mln teńgege «Tolaǵaı-2050» JShS júrgizedi.
— Shaǵan tarmaǵy men Kóshim kanaly jaǵasynda ondaǵan jyldar boıy butalar men aǵashtar ózdiginen ósken. Mundaı jaǵdaıda mehanıkalandyrylǵan tazartý jumystaryn tal-terekterdi otamaı júrgizý múmkin emes. Bul joba boıynsha qarastyrylǵan. Jumysqa kesel keltirmeıtin aǵash pen butalar kesilmeıdi. Qalǵan tal-terekter aldaǵy ýaqytta aǵash ósimdikteriniń tez qalpyna kelýine septesedi, — delingen resmı jaýapta.
Eske sala keteıik, budan buryn Batys Qazaqstanda egilgen mıllıondaǵan aǵashtyń nege jersinbeı qýrap ketetinin jazǵan edik.
Sondaı-aq Batys Qazaqstanda karerler zańdy paıdalanylyp otyr ma, bul da jazyldy.