Batys Qazaqstanda kıik eti qalaı satylyp jatyr

ORAL. KAZINFORM — Batys Qazaqstan oblysynda kıik etin qabyldaý, óńdeý jáne ótkizýmen kelisilgen 7 kásiporynnyń beseýi aınalysyp jatyr.

BQO aýyl sharýashylyǵy basqarmasynyń basshysy Jasulan Halıýllınniń Kazinform tilshisiniń saýalyna baılanysty málim etkenindeı, sonyń ishinde «Kaırov» JK, «Amangeldi» JK, «Jalpaqtal» aýyl sharýashylyǵy óndiristik kooperatıvi jáne «Jeńis» JK kıik etin ushalaı satyp jatyr.

Jasulan Joldybaıulynyń sózine qaraǵanda, atalǵan kásiporyndar suranysqa baılanysty kıik etin oblys ishinde jáne odan tys aýmaqtarǵa ótkizedi. 

— Ótkizý baǵasy — kılogramyna 1 300-1 600 teńgeden. ıAǵnı, kóterme saýda baǵasy 1 300 teńge, bólshek saýdada 1 500-1 600 teńge aralyǵynda. Búgingi tańda kıik soıý oryndaryna 7 990 bas, sonyń ishinde 3 682-si «Kýbleı» JShS, qalǵan 4 308-i et kombınattaryna ótkizildi. «Kýbleı» JShS kıik eti men ishki qurylystaryn tereń óńdep, qalbyrlar óndirýdi josparlap otyr. Kásiporyn qalbyr óndirisin qýattylyǵyna sáıkes qajetti shıkizat kólemin tolyq daıyndaǵan soń bastaıtyn bolady, — deıdi basqarma basshysy.

Onyń aıtýynsha, et kombınattaryna tapsyrylǵan 4 308 bas kıiktiń 408 ushasy suranysqa sáıkes oblys aýmaǵynda satylsa, 2 005 ushasy elimizdiń basqa óńirleri — Mańǵystaý, Aqtóbe, Túrkistan oblystaryna jóneltilgen.

Batys Qazaqstan oblysynda kıik sanyn retteý jumystary jalǵasyp keledi.

Eske sala keteıik, budan buryn kıikten zardap shekken fermerlerge ótemaqy tólene me degen saýalǵa jaýap izdep kórdik. 

Batys Qazaqstanda kıik sanyn retteý jumysy qalaı júrgizilip jatqany da habarlandy.