Batys Qazaqstanda Keleshek mektebi esigin aıqara ashty
ORAL. KAZINFORM — Batys Qazaqstan oblysy Báıterek aýdany Baıqonys aýylynda «Keleshek mektepteri» ulttyq jobasy aıasynda salynǵan 600 oryndyq Qadyr Myrza Áli atyndaǵy qazaq orta mektebiniń jańa ǵımaraty paıdalanýǵa berildi.
Jańa ǵımarattyń ashylý rásimine qatysqan Batys Qazaqstan oblysynyń ákimi Narıman Tóreǵalıev quttyqtaý sózinde Qazaqstan Respýblıkasynyń Konstıtýtsııasynyń el birligin, turaqtylyǵyn jáne azamattardyń teń quqyqtaryn qamtamasyz etýdegi róline toqtaldy. Sondaı-aq Memleket basshysy Qasym-Jomart Toqaevtyń orta bilim sapasyn arttyrýǵa qatysty tapsyrmalarynyń óńirde naqty júzege asyrylyp jatqanyn atap ótti.
— Orta bilimniń sapasy — tabysty ult bolýdyń mańyzdy sharty. Árbir oqýshynyń bilim alyp, jan-jaqty damýy úshin qolaıly jaǵdaı jasalýǵa tıis. Búgingi Baıqonystaǵy eńseli mektep — osy mindettiń naqty oryndalýynyń kórinisi, — dedi aımaq basshysy.
Ákimniń málim etkenindeı, sońǵy úsh jylda oblys kóleminde 7 526 orynǵa arnalǵan 26 jańa mektep salyndy. Sonyń ishinde 16-sy «QPO b. v.» kompanııasynyń áleýmettik ınvestıtsııalyq jobasy aıasynda boı kóterse, jeteýi jergilikti bıýdjet esebinen iske qosyldy. Úsh mektep «Keleshek mektepteri» ulttyq jobasy aıasynda paıdalanýǵa berildi.
Buǵan deıin jańa oqý jyly qarsańynda Kaztalov aýdany Qonys aýylynda 60 oryndyq shaǵyn mektep ashylǵan bolatyn.
Jańa mektep ǵımaraty oqýshylarǵa sapaly bilim men sanaly tárbıe alýǵa, muǵalimderge shyǵarmashylyqpen jumys isteýge múmkindik beredi.
Oblys ákimi Narıman Tóreǵalıev sóziniń sońynda aýyl turǵyndaryn, ustazdar men oqýshylardy aıtýly oqıǵamen quttyqtap, jas urpaqtyń otanshyl, bilimdi ári parasatty azamat bolyp ósýine tilektestik bildirdi.
Baıqonys aýylynyń turǵyny, ardager ustaz Qýanysh Taýbaı da sóz alyp, aýyl úshin bul oqıǵanyń aıryqsha tarıhı sát ekenin jetkizdi.
Mektep zamanaýı bilim berý talaptaryna tolyqtaı saı: STEM, robot tehnıkasy, vızýaldy dızaın, horeografııa, erekshe bilimdi qajet etetin balalarǵa arnalǵan sensorlyq jáne ınklıýzıvti kabınetter jumys isteıdi. Oqý bólmeleri keń de jaryq, sport jáne akt zaldary da bar.
Eske sala keteıik, budan buryn Batys Qazaqstan mektepterinde 126 myńnan astam oqýshy bilim alatynyn jazǵan edik.