Batys Qazaqstanda qaban aýlaǵan brakoner ustaldy

ORAL. KAZINFORM — Batys Qazaqstan oblysy polıtsııa departamentiniń tabıǵatty qorǵaý polıtsııasy zańsyz ań aýlaý deregin anyqtady. 

BQO polıtsııa departamentiniń baspasóz qyzmetinen málim etkenindeı, oqıǵa Báıterek aýdany aýmaǵynda boldy.

Túngi ýaqytta Úlken Shaǵan-Peremetnyı tas jolynyń 15-shaqyrymynda Oral qalasynyń 53 jastaǵy turǵyny aıdap kele jatqan Toyota Land Cruiser avtokóligi toqtatyldy. 

— Kólikti tekserý barysynda salonnan eki qabannyń ushasy, 7 dana oq-dári, eki pyshaq jáne bir balta tabylyp, tárkilendi. Kólik aıyp turaǵyna qoıyldy. Atalǵan derek boıynsha qylmystyq is qozǵalyp, tergeý amaldary júrgizilip jatyr, — dep habarlady vedomstvodan.

Eske sala keteıik, budan buryn BQO-da qarý men kıik múıizin zańsyz saqtaǵan sharýa qojalyǵynyń basshysy ustalǵanyn jazǵan edik. 

Sondaı-aq Batys Qazaqstanda 3 avtokólik soqtyǵysyp, júrgizýshi kóz jumdy.