Batys Qazaqstanda 8,6 mlrd teńge ıgerilmeı qalǵan
ORAL. KAZINFORM – Batys Qazaqstan oblysy bıýdjetiniń shyǵys bóliginde áleýmettik salaǵa basa nazar aýdarylyp keledi.
BQO qarjy basqarmasynyń basshysy Nurlan Esenǵalıevtiń óńirlik kommýnıkatsııalar qyzmeti alańynda ótken brıfıngte málim etkenindeı, bıyl birinshi jartyjyldyqta áleýmettik salaǵa 310 mlrd teńge qaralǵan nemese bul – bıýdjet kóleminiń 52,2 paıyzy.
Nurlan Muhıtulynyń sózine qaraǵanda, ekonomıkanyń naqty sektoryna 199,3 mlrd teńge (33,6 paıyz), sonyń ishinde agrarlyq-ónerkásiptik salaǵa 76,9 mlrd, kólikke 56,4 mlrd, turǵyn úı-kommýnaldyq sharýashylyqqa 66 mlrd teńge berilgen.
- Oblys bıýdjetiniń shyǵystary birinshi jartyjyldyqta 263 mlrd teńgege nemese jospar 96,9 paıyzǵa (2024 jyly osy merzimde – 251 mlrd, ósim – 12 mlrd teńge) oryndaldy. Oblys boıynsha 8,6 mlrd teńge ıgerilmegen, - dedi N.Esenǵalıev.
Onyń aıtýynsha, osy jyly damý bıýdjetine 69,6 mlrd teńge baǵyttaldy. 1 shildege deıin jospardaǵy 31,9 mlrd teńgeniń 24,8 mlrd teńgesi nemese 77,6 paıyzy ıgerildi. Sol sekildi respýblıkalyq bıýdjetten maqsatty transfertter men nesıeler boıynsha jospar 26,3 mlrd teńge bolsa, ol tek 73,9 paıyzǵa (19,4 mlrd) oryndaldy. Munyń basty sebebi – joǵary turǵan bıýdjetten transfertterdiń túspeýi (4,9 mlrd teńge).
- Búgingi tańda oblystyń jyldyq bıýdjeti 593,9 mlrd teńge bolsa, sonyń 35,4 paıyzy nemese 210,3 mlrd teńgesi jergilikti deńgeıge túsetin salyqtar men salyqtyq emes tólemderden, ıaǵnı ózindik kiristerden turady. Al 55,5 paıyzy (329,8 mlrd) - respýblıkalyq bıýdjetten beriletin sýbventsııaǵa jáne maqsatty transfertterge tıesili. 1 shildedegi málimetke sáıkes óz kiristeri boıynsha naqtylanǵan jyldyq jospar 210,3 mlrd bolsa, osy kezeńde jospardaǵy 105,9 mlrd teńgeniń ornyna jergilikti bıýdjetke 125,9 mlrd teńge tústi nemese 118,9 paıyzǵa oryndaldy. Ótken jyldyń osy kezeńimen salystyrǵanda, menshikti kiristerdiń ósý qarqyny 114,6 paıyzǵa jetip, ósim 16,3 mlrd teńge boldy, - dedi basqarma basshysy.
Onyń málimdeýinshe, bıylǵy birinshi jartyjyldyqta sondaı-aq memlekettik baǵaly qaǵazdar shyǵarylymynan 2,9 mlrd teńge kóleminde naqty túsim alyndy.
Jalpy, memlekettik baǵaly qaǵazdar bıylǵy 28 mamyrda QR Úkimetiniń qaýlysymen bekitilgen qaryz alý maqsattarynyń tizbesi aıasynda, atap aıtqanda, turǵyn úı salý jáne satyp alý, turǵyn úı qurylysy salynatyn aýdandardyń ınjenerlik-kommýnıkatsııalyq ınfraqurylymyn damytý, sondaı-aq «Energetıkalyq jáne kommýnaldyq sektorlardy jańǵyrtý» ulttyq jobasyna oraı jeliler men júıelerdi salý jáne jańǵyrtý baǵytynda shyǵarylady.
Eske sala keteıik, budan buryn óńirler ortalyqqa jaltaqtamaı, óz bıýdjetimen kúnin kóre ala ma, sony jazǵan edik.