Batys Qazaqstanda 413 eldi mekenniń 334-i ınternetke qosylǵan
ORAL. KAZINFORM – Batys Qazaqstan oblysynda baılanys operatorlarynyń málimeti boıynsha 413 aýyldyq eldi meken bolsa, sonyń 334-i ınternetke qosylǵan.
BQO tsıfrlyq tehnologııalar basqarmasy ınfraqurylymdyq damý bóliminiń basshysy Erǵalı Erjanovtyń óńirlik kommýnıkatsııalar qyzmeti alańynda ótken brıfıngte málim etkenindeı, 2023 jyly BQO ákimdigi men QR Tsıfrlyq damý, ınnovatsııalar jáne aeroǵarysh ónerkásibi mınıstrligi birlesip bekitken jol kartasyna sáıkes Oral qalasy men 70 aýylda mobıldi ınternetpen qamtý jáne sapasyn jaqsartý jumystary júrgizildi.
Onyń sózine qaraǵanda, bıyl Oral qalasy men 175 eldi mekende osyndaı is atqarylmaq. Sonyń ishinde 39 aýylda jańadan bazalyq stantsııa salý, qalǵandarynda jańǵyrtý jumystary josparlanǵan. Kúni búginge deıin 5 eldi meken mobıldi ınternetpen qamtylyp, sapasy jaqsartyldy.
«Bıyl «Ksell» AQ baılanys operatory 26 eldi mekenniń 17-sinde jańadan bazalyq stantsııa salyp, qalǵan 9-yn jańǵyrtpaqshy. Sol sekildi «Kar-Tel» (Bılaın) JShS 23 eldi mekende jańa bazalyq stantsııa ornatyp, 132 aýylda jańartý jumystaryn atqarýdy josparlasa, qazirdiń ózinde ekeýi baılanys jáne mobıldi ınternet jelisimen qamtamasyz etildi», - deıdi E.Erjanov.
Onyń aıtýynsha, QR Tsıfrlyq damý, ınnovatsııalar jáne aeroǵarysh ónerkásibi mınıstrligi Telekommýnıkatsııalar komıtetiniń óńiraralyq baılanys ınspektsııasy nysandarda baılanys qyzmetiniń sapasyn udaıy tekserip keledi. Ótken jyly jospardan tys 63 tekserý nátıjesinde 27 eldi men Oral qalasy boıynsha operatorlar ákimshilik jaýapkershilikke tartylyp, 165 mln teńge aıyppul salynǵan bolatyn.
«Bıyl jyl basynan beri baılanys operatorlaryna jospardan tys 23 tekserý júrgizilip, 44,1 mln teńge (onyń ishinde: Bılaın - 19,3 mln teńge, Tele 2/Altel - 19,3 mln teńge, Ksell / Aktıv - 5,5 mln teńge) kóleminde aıyppul salyndy», - dedi basqarmanyń bólim basshysy.
Onyń málimdeýinshe, uıaly baılanys pen ınternet sapasyna radıofobııa keri áser etedi. Mysaly, Oral qalasynda Murat Móńkeuly, Birlik kóshesi, 10-shaǵynaýdan, «Juldyz» shaǵynaýdany jáne basqa aýdandarda turǵyndar kópqabatty úılerdiń tóbesine bazalyq stantsııany ornatýǵa ruqsat bermeı otyr. Buǵan sebep – bazalyq stantsııalar adam densaýlyǵyna zııan degen jalǵan aqparattardyń keńinen taralýy.
«Buryn bolmaǵan, jańadan engizilgen nárseden qorqý – qalypty qubylys. Degenmen ómirimizge dendep engen jańa tehnologııalarǵa beıimdelýimiz kerek. Sonymen qatar baılanys operatorlary bazalyq stantsııalardy (antennalar) ornatý kezinde sanıtarııalyq-epıdemıologııalyq baqylaý departamentimen qajetti qujattardy rásimdep, adam densaýlyǵyna qaýipsiz ekendigi jóninde qorytyndysyn alady. Ekinshi másele – sertıfıkattalmaǵan repıtor, ıaǵnı kúsheıtkish qurylǵy ornatý. Mundaı qurylǵy bazalyq stantsııaǵa kelip turǵan sıgnaldardyń sapasyn nasharlatady. Sonyń saldarynan aýyl turǵyndary sapaly qyzmet ala almaıdy. Bylaısha aıtqanda, aýylda bir úıde sertıfıkattalmaǵan osyndaı qurylǵy ornatsa, onyń kórshisi baılanys nemese mobıldi ınternetti durys paıdalana almaıdy. Mundaı derekterdi óńiraralyq baılanys ınspektsııasy aýyldardaǵy baılanys jáne mobıldi ınternettiń sapasyn teksergen kezde jıi kezdestiredi», - dedi E.Erjanov.
