Batys Qazaqstanda 31 myńnan astam adam turǵyn úı kezeginde tur
ORAL. KAZINFORM – Batys Qazaqstan oblysynda 31 685 adam memlekettik turǵyn úı qorynan baspana alý úshin kezekte tur.
BQO energetıka jáne turǵyn úı-kommýnaldyq sharýashylyq basqarmasy basshysynyń orynbasary Qanat Ómirálıevtiń óńirlik kommýnıkatsııalar qyzmeti alańynda ótken brıfıngte málim etkenindeı, sonyń ishinde 18 553-i halyqtyń áleýmettik osal toptary, 4 073-i kóp balaly otbasy sanattary boıynsha kezekke qoıylǵan.
Qanat Amangeldiulynyń sózine qaraǵanda, bıyl jyl basynan beri 114 azamat kezektilik tártibimen baspanamen qamtamasyz etildi. Sonyń ishinde beseýi – jalǵyz baspanasy apatty dep tanylǵandar, altaýy – memlekettik jáne bıýdjettik uıym qyzmetkerleri, 103-i – halyqtyń áleýmettik osal toptaryna jatatyn adamdar, munyń ishinde 30-y – kóp balaly otbasylar, 25-i – tolyq emes otbasylar, jeteýi – múgedek balalary barlar, 15-i – 1 jáne 2 toptaǵy múgedekter, 20-sy – jetim jáne ata-ana qamqorlyǵynsyz qalǵan balalar, tórteýi – jasy boıynsha zeınetkerler, bireýi Ekinshi dúnıejúzilik soǵys ardagerlerine teńestirilgen, taǵy bireýi basqa memleketter aýmaǵynda áskerı qımyldarda bolǵan.
«2024 jyly bıýdjet qarajaty esebinen «Otbasy bank» AQ arqyly 12 kóppáterli úıdi (216 páter) qoldanysqa berý josparlanǵan bolatyn. Osy ýaqytqa deıin «Baqytty otbasy» jeńildetilgen ıpotekalyq baǵdarlamasy aıasynda 80 páterlik turǵyn úı paıdalanýǵa berildi. Sonymen qatar turǵyn úı sertıfıkattaryn usyný úshin oblystyq bıýdjetten 400 mln teńge (Oral qalasyna – 240 mln, Bórlige – 50 mln, qalǵan aýdandarǵa – 10 mln teńgeden) qarajat bólindi. Kúni búginge deıin 37 azamatqa 35 mln 810,5 myń teńge kóleminde turǵyn úı sertıfıkattary berildi», - dedi M.Ómirálıev.
Onyń aıtýynsha, Memleket basshysynyń tapsyrmasyna sáıkes 2022 jyly halyqtyń áleýmettik osal toptary úshin turǵyn úıdi jaldaý aqysyn sýbsıdııalaý tetigi engizildi.
QR Indýstrııa jáne ınfraqurylymdyq damý mınıstriniń 2022 jylǵy 8 aqpandaǵy № 60 buıryǵymen bekitilgen Jeke turǵyn úı qorynan jalǵa alynǵan turǵynjaı úshin azamattardyń jekelegen sanattaryna tólemder taǵaıyndaý jáne júzege asyrý qaǵıdalaryna sáıkes 4 sanat boıynsha kezekte turǵandardyń (1 jáne 2 toptaǵy múgedekter, múgedek balalary bar nemese olardy tárbıelep otyrǵan otbasylar, jetim balalar, kóp balaly otbasylar) óteýsiz negizde tólemder alýǵa múmkindigi bar.
Jeke turǵyn úı qorynan jalǵa alynǵan turǵyn úı úshin tólemder bıýdjet qarajaty esebinen 50 paıyz jáne alýshydan 50 paıyz teńgerimdi negizde júzege asyrylady.
«Bıyl jaldaý aqysyn sýbsıdııalaý boıynsha tólemder júrgizý úshin oblystyq bıýdjetten 50 mln teńge qaralyp, 26 aqpanda «Otbasy bank» AQ-men kelisim-shart jasaldy. Osy kezge deıin «Otbasy bank» AQ deregine sáıkes azamattarmen 174 jaldaý sharty tirkelip, 4,8 mln teńge ıgerildi», - dedi basqarma basshysynyń orynbasary.
