Batys Qazaqstanda 300-den astam adam týberkýlezge shaldyqty

ORAL. KAZINFORM – Batys Qazaqstan oblysynda ótken jyly týberkýlezdiń belsendi túrimen aýyrǵan 302 naýqas tirkeldi.

BQO sanıtarııalyq-epıdemıologııalyq baqylaý departamenti basshysynyń orynbasary Nurlybek Mustaevtyń Kazinform tilshisine málim etkenindeı, bul kórsetkish aldyńǵy jylmen salystyrǵanda, 1,6 paıyzǵa tómendegen.

Onyń sózine qaraǵanda, 15-17 jas aralyǵyndaǵy 13 jasóspirim osy juqpaly dertpen aýyrǵan, bul 2023 jylǵydan 26,8 paıyzǵa az.

- Týberkýlez – ókpe men lımfa túıinderinde erekshe qabyný ózgeristeriniń paıda bolýymen sıpattalatyn juqpaly aýrý. Ol negizinen ókpeni zaqymdaıdy, biraq súıek, búırek, mı men mı qabyqtarynyń, teri, kóz jáne basqa múshelerdiń týberkýlezi bolýy múmkin. Týberkýlez ınfektsııasynyń negizgi kózi – týberkýlezdiń ashyq túrimen aýyratyn naýqas jáne dert, ásirese, qaqyryq arqyly juǵady, - deıdi N.Mustaev.

Departament basshysy orynbasarynyń aıtýynsha, aýrýdyń negizgi belgileri: eki apta boıy jótel, jalpy álsizdik jáne sharshaǵyshtyq, qyzýdyń uzaqqa sozylýy, keýdedegi aýyrsyný, túnde tersheńdik, tábettiń tómendeýi, aryqtaý, qan ketý. Bul belgiler basqa aýrýlarda da bolýy múmkin. Mundaı belgilerdiń sebebin tek dáriger anyqtaı alady.

- Juqpaly týberkýlezben aýyratyn naýqastarda jótel negizgi sımptom bolyp tabylady. Dertten saqtaný úshin aldyn alý sharalaryn umytpaý qajet. Eń aldymen jańa týylǵan nárestelerge týberkýlezge qarsy BTsJ vaktsınatsııasy (anasy bosanǵannan keıin 2-4 táýlikte perzenthanada) jasalady. Jylyna bir ret flıýorografııalyq tekserýden ótý jáne balalardy Mantý reaktsııasyna tekserý kerek. Sondaı-aq jeke bas gıgıenasy erejelerin saqtap, salaýatty ómir saltyn ustanǵan abzal, - dedi N.Mustaev.

Eske sala keteıik, budan buryn Batys Qazaqstanda metapnevmovırýspen aýyrǵan 4 balanyń jazylyp shyqqanyn jazǵan bolatynbyz.